«Нур карвони»: суриялик қочқинлар Туркиядан Европа Иттифоқига энг катта миграцияни режалаштирмоқда
Акция Теlegram мессенжеридаги канал орқали мувофиқлаштирилиб, унга аллақачон 85 000 га яқин одам қўшилган.
Акция ташкилотчилари чегарани пиёда кесиб ўтмоқчи бўлган мигрантларни чодир ва зарур нарсаларни тайёрлашга чақирмоқда. Тахминларга кўра, карвон 50 кишигача бўлган гуруҳларга бўлиниб, уларнинг ҳар бирига гуруҳ масъул шахси раҳбарлик қилади.
Бугун ижтимоий тармоқлардаги «Нур карвони» акцияси саҳифасида одамлар Европа давлатлари билан чегарага қараб ҳаракатлана бошлаган сана ва вақт ҳақида ҳеч қандай маълумот йўқ. Бу тез орада амалга ошиши кутилмоқда.
Гуруҳ ташкилотчилари ўз исмларини ошкор этмаяпти ва Европадаги инсон ҳуқуқлари ташкилотларига уларнинг Туркиядан Европага кўчишига кўмаклашишни сўраб мурожаат қилмоқда.
«Биз, Туркия тупроғидаги сурияликлар, сиздан бу тупроқда қувғинга учраган қочқинларнинг нажоти бўладиган конвойни қўллаб-қувватлашингизни сўраймиз. Биз халқаро ва инсон ҳуқуқлари ташкилотлари, шунингдек, ОАВдаги ғамхўр одамлардан ёрдам сўраймиз», — дейилади намойиш ташкилотчилари баёнотида.
Ўз нашрларида, шунингдек, «турк халқи ва давлатидан миннатдор эканликларини» ва энди Туркиянинг сурияликларга мезбонлик қилиш орқали ўн йилдан бери кўтариб келаётган «юкни енгиллатмоқчи» эканликларини ҳам таъкидлайдилар. Бунинг учун ташкилотчиларнинг фикрича, уларга Европага етиб олиш учун ёрдам керак.
Туркиядаги кўплаб суриялик қочқинлар, айниқса, Туркиянинг Дамашққа муносабати яқинда ўзгаргани ва Туркия расмийлари, жумладан Туркия Ташқи ишлар вазири Мавлут Чавушўғлининг Сурия режими билан муроса қилиш ва икки томон ўртасидаги сиёсий муносабатларни нормаллаштириш ҳақидаги баёнотларидан сўнг, улар қайтариб юборилишидан қўрқишади, дея маълум қилди Аsharq al-Awsat.
«Ҳозирча биз чегарадан ўтиш учун расмий рухсат олганимиз йўқ, чунки биз унинг бошланиш санасини белгиламадик. Биз карвоннинг кесиб ўтишни осонлаштириш учун рухсат излаяпмиз», — дейилади ташкилотчиларнинг Facebookдаги расмий саҳифасида.
Айни вақтда Бирлашган Миллатлар Ташкилотининг Қочқинлар бўйича Олий комиссарлигининг Туркиядаги бошқармаси суриялик қочқинларни Туркиядан Европага Болгария ёки Греция орқали боришни режалаштираётган карвонга қўшилмаслик ҳақида огоҳлантирди, дея хабар беради Syrian Observer.
Бирлашган Миллатлар Ташкилотининг Қочқинлар бўйича Олий комиссарлиги ўз баёнотида карвонга қўшилишни режалаштираётган қочқинларни ҳибсга олиш, қамоқ, оиладан ажралиш ва ҳатто ўлим каби жиддий оқибатларга олиб келиши мумкинлигидан огоҳлантирди.
Баёнотда, шунингдек, карвонга қўшилган қочқинлар йўлда ўлиш хавфига дуч келиши мумкинлиги айтилган. Унда: «Туркия-Греция-Болгария чегарасига уюшган ҳаракат режаларини кўрсатувчи маълумотлар бор ва бу схемалар ҳаракат иштирокчилари чегарани Греция, Болгария, сўнгра бошқа давлатларга кесиб ўтиш ниятида эканликларини кўрсатади», - деб қўшимча қилинган.
Бугунги кунда, БМТ маълумотларига кўра, Туркияда расман 3,6 миллионга яқин суриялик қочқин яшайди.
Фото: elaphjournal.cоm
Муаллиф: Арсен Ўтешев
