Норвегияда эҳтимолий саботаж туфайли 60 минг тонна нефть оқиб кетди

ASTANA. Kazinform - Осло яқинидаги эски трансформатор подстанциясида катта миқдорда нефть оқиб кетди. Воқеа содир бўлган жойда ичкарига кириш излари топилган. Экологлар ифлосланиш кўламидан хавотирда, дея хабар беради Кazinform агентлиги Euronewsга таяниб.

Якшанба куни Осло яқинидаги Берум муниципалитетидаги эски трансформатор станциясидан 60 минг тоннага яқин нефть сизиб чиқди. Норвегия полицияси эҳтмолий саботаж ҳаракатини текширмоқда.

Маҳаллий электр тармоқлари оператори Statnettнинг фикрича, ҳодиса ҳужумчиларнинг қасддан қилган ҳаракатлари натижасидир. Станциядаги панжара шикастлангани ва кимдир трансформатор бакининг қопқоғини бураб қўйгани айтилмоқда.

— Кўриниб турибдики, кимдир ичкарига кириб, трансформатор қопқоғини олиб ташлаб, уни очиқ қолдирган ва бунинг натижасида катта миқдордаги нефть оқиб кетган, — деди Statnett вакили Томас Феннефосс.

Бироқ, полиция баёнотида бу назариянинг аниқ далиллари ҳали йўқлигини айтди.

Вазият одамлар учун дарҳол хавф туғдирмайди. Аммо атроф-муҳит учун ўта хавфли бўлган нефть маҳсулоти станция яқинида оқадиган Сандвик дарёсига, шунингдек, тупроққа тушди. Шу муносабат билан экспертлар атроф-муҳитнинг ифлосланиш кўлами ва умуман мамлакатдаги экологик хавфсизликдан хавотир билдирмоқда.

Эслатиб ўтамиз, аввалроқ Шимолий Македониядаги тунги клубдаги ёнғинда 51 киши ҳалок бўлгани ҳақида хабар берган эдик.