Нефть нархлари кетма-кет иккинчи ҳафта кўтарилди: Brent нархи 94 долларга яқинлашди
ASTANA. Kazinform — Жаҳон нефть нархлари 21 август куни эрталаб юқори даражада қолди ва Яқин Шарқдан етказиб бериш хавфи давом этаётган бир пайтда кетма-кет иккинчи ҳафтани ўсиш билан якунлашга тайёр, деб хабар беради Kazinform агентлиги Reutersга таяниб.
Brent нефтининг фьючерслари 1 баррель учун 93,82 долларга кўтарилди. Американинг WТI нефти нархи 1 баррел учун 86,78 долларга бироз пасайди.
Brent ҳафта давомида 7% дан ортиққа ошди, WТI эса 8% дан ортиққа ошди. Яқин Шарқнинг бир қанча мамлакатларидан нефть етказиб беришни чеклашда давом этаётган АҚШ-Эрон можароси атрофидаги кескинликлар ўсишнинг асосий омили бўлиб қолмоқда.
Brent бир кун олдин 1 баррель учун 93,78 доллардан ёпилди, WТI эса 87,83 доллардан ёпилди. Иккала марка ҳам 2% дан кўпроққа кўтарилиб, 24 июлдан бери энг юқори даражага етди.
Бозор иштирокчилари анъанавий равишда глобал нефть етказиб беришнинг катта қисми ўтадиган Ҳормуз бўғозидаги вазиятга эътибор қаратишда давом этмоқда. Минтақадаги юк ташиш можаро авж олишидан олдинги даражадан пастлигича қолмоқда.
Эслатиб ўтамиз, 20 августда эрталаб жаҳон нефть нархлари турлича динамикани намоён этиб, Яқин Шарқдаги кескинлик давом этаётгани фонида қарийб тўрт ҳафта ичидаги энг юқори даражага яқинлашган эди.
