Наманганда Халқаро бағрикенглик куни нишонланди

Наманган давлат чет тиллари институтида “Бағрикенглик ҳафталиги” доирасида “Балли қизлар” кўрик-танлови ташкил этилди. Миллатлараро бағрикенглик, маданиятлар алмашинувини ўзида мужассам этган тадбир орқали ўзбек, рус, тожик, корейс, қирғиз каби миллатларнинг ўзига хос жиҳатлари кўрсатиб берилди, деб хабар беради Kazinform агентлиги ЎзАга таяниб.

Маълумки, 1995 йил 16 ноябрда ЮНЕСКО Бош конференциясининг Бағрикенглик тамойиллари декларацияси қабул қилинган. БМТ Бош Ассамблеясининг қарорига кўра, 1997 йилдан буён мазкур ҳужжат қабул қилинган сана ҳар йили бутун дунёда “Халқаро бағрикенглик куни” сифатида нишонланади. Бундан кўзланган асосий мақсад дунё халқларини бағрикенгликка, тинчликни асраб-авайлашга ҳамда ижтимоий-иқтисодий фаровонликка чорлашдир.

Учта шартдан иборат бўлган кўрик-танловда дастлаб ҳар бир иштирокчи акс эттираётган миллат руҳидан келиб чиққан ҳолда, ўзини таништириб ўтди. Савол-жавоблар қисмида эса талаба-қизларнинг сиёсий, ижтимоий-маданий, илмий саводхонлик йўналишларидаги билими синовдан ўтказилди. Сўнги шарт – бадиий қисм бўлиб, унда турли халқларнинг миллий рақслари моҳирона ижро этилди.

Тадбир йиғилганларда катта таассурот қолдирди.