Мурат Нуртилеу ўзбекистонлик мутахассисларни дипломатлар ва тиббиёт ходимлари учун курсларга таклиф қилди

ASTANA. Kazinform – Қозоғистон ва Ўзбекистонда истиқомат қилаётган ватандошларимиз икки давлатни боғловчи “олтин кўприк” саналади. Бу ҳақда ҚР Бош вазири ўринбосари – Ташқи ишлар вазири Мурат Нуртилеу Ўзбекистон ташқи ишлар вазири Бахтиёр Саидов билан Астанада ўтказилган кенгайтирилган музокаралардан сўнг ўтказилган брифингда маълум қилди.

“Қозоғистон ва Ўзбекистонда яшовчи ватандошларимиз икки давлатни боғловчи “олтин кўприк” саналади. Маълумки, Қозоғистонда 500 мингга яқин ўзбек, Ўзбекистонда эса 800 мингга яқин қозоқ истиқомат қилади. Биз уларнинг барчасини икки давлатни яқинлаштирадиган яхши омил, деб биламиз. Ватандошларимиз ёки диаспораларни қўллаб-қувватлаш учун давлатлар томонидан етарли шароитлар яратилган. Мактаблар бор, газеталар чиқади. Қозоғистонда 2 та ўзбек театри бор. Шунинг учун биз бу йўналишда кейинги қадамларни қўйишга келишиб олдик”, – деди Мурат Нуртилеу.

Унинг сўзларига кўра, Қозоғистон ва Ўзбекистоннинг ўзаро маданият кунлари мунтазам ўтказиб келинмоқда. Ёшлар ўртасида фаол мулоқот йўлга қўйилди. Бугунги кунда Қозоғистон олий ўқув юртларида 6 мингдан ортиқ Ўзбекистон фуқароси таҳсил олмоқда.

“Ўтган йили Алматидаги Қозоғистон миллий аграр тадқиқот университети негизида “Тошкент ирригация ва қишлоқ хўжалигини механизациялаш муҳандислари институти” филиали иш бошлади. Яқинда Чирчиқ шаҳрида М.Ауезов номидаги Жанубий Қозоғистон университетининг филиали очилди”, – дейди у.

Вазир ўзбекистонлик мутахассисларни Қозоғистоннинг KazAID агентлиги томонидан ташкил этилган ёш давлат хизматчилари, дипломатлар ва тиббиёт ходимлари учун ўқув курсларига таклиф қилганини таъкидлади.

"Таклифимизни қабул қилгани учун Ўзбекистон томонига яна бир бор миннатдорчилик билдираман", – деди Мурат Нуртилеу.