Мўғулистонда 36,1 минг нафар хорижий фуқаро меҳнат қилмоқда
ASTANA. Kazinform — Жорий йилнинг учинчи чораги якунларига кўра, Мўғулистонда 114 мамлакатдан келган 36,1 минг нафар хорижий фуқаро меҳнат қилган, деб хабар беради Монцамэ.
Улар меҳнат шартномаси асосида ишлаб, маош ёки бошқа даромад олиш билан бирга, волонтёрлик фаолияти билан ҳам шуғулланади.
Миллий статистика қўмитаси маълумотларига кўра, мамлакатда ишлаётган хорижликлар сони ўтган йилнинг мос даврига нисбатан 51,5 фоизга (12,3 минг нафарга), аввалги чоракка нисбатан эса 19,8 фоизга (6 минг нафарга) ошган.
Меҳнат шартномаси асосида ишлаётган хорижликларнинг 92,8 фоизини ёки 33,5 минг нафарини эркаклар, 7,2 фоизини ёки 2,6 минг нафарини эса аёллар ташкил этади. Ёш тоифалари бўйича энг катта гуруҳни 35–39 ёшдаги фуқаролар ташкил қилади. Уларнинг сони 6,4 минг нафарни ташкил этган. 20 ёшга тўлмаганлар эса энг кам бўлиб, уларнинг сони 305 нафарни ташкил қилган.
Шунингдек, учинчи чоракда ишга жойлаштириш хизматлари кўмагида 111 нафар киши хорижга ҳақ эвазига ишлаш учун юборилган. Бу кўрсаткич ўтган йилнинг мос даврига нисбатан 46,1 фоизга (95 нафарга) кам, аввалги чоракка нисбатан эса 18,1 фоизга (17 нафарга) кўпдир.
