МСК Озарбайжонда бўлиб ўтадиган президентлик сайловида кузатувчилар сонини эълон қилди
BAKU. Kazinform- Озарбайжонда навбатдан ташқари президентлик сайловини кузатиш учун 90 мингдан ортиқ кузатувчи рўйхатга олинган. Бу ҳақда Марказий сайлов комиссияси раиси Мазоҳир Паноҳов Ислом ҳамкорлик ташкилоти (ИҲТ) бош котибининг сиёсий масалалар бўйича ёрдамчиси Йосеф Альдобеа билан учрашувда маълум қилди, деб хабар беради Kazinform мухбири.
— Ҳар бир сайлов участкасида 13-14 нафардан кузатувчи бор. Бизда 6 миллиондан ортиқ сайловчи бор. Улар 6537 та сайлов участкасида овоз беради. Барча ҳудудлар зарур жиҳозлар билан жиҳозланган. Сайловчиларнинг бемалол овоз беришлари учун барча шарт-шароит яратиб берилган, – деди у.
Эслатиб ўтамиз, сайловни кузатишда Туркий давлатлар ташкилотига аъзо барча давлатларнинг вакиллари, МДҲ Парламентлараро Ассамблеяси ва Шанхай ҳамкорлик ташкилоти, ЕХҲТ Демократик институтлар ва инсон ҳуқуқлари бўйича бюросининг халқаро кузатувчилари иштирок этади. Овоз бериш жараёнини Туркия, Россия, Германия, Италия, Япония ва бошқа давлатлардан 63 халқаро медиа ташкилоти кузатиб боради.
7 февраль куни навбатдан ташқари президентлик сайлови бўлиб ўтади ва унда етти нафар номзод иштирок этади. Давлат раҳбари лавозимига номзодларни рўйхатга олиш жараёни 9 январь куни, уларнинг сайловолди ташвиқоти 6 февраль куни якунланди.
Озарбайжонда президентлик сайлови ҳар 7 йилда бир марта ўтказилади. Охирги марта 2018 йилнинг 11 апрелида бўлиб ўтган. 2023 йил 7 декабрда мамлакатда муддатидан олдин президентлик сайлови ўтказилиши эълон қилинди. Тегишли фармон президент Илҳом Алиев томонидан имзоланди.
Муаллиф: Серикбол Қошмағанбетов
