Мессининг "Интер Майами"даги маоши маълум бўлди

Лионель Месси
Фото: championat.com

Шимолий Америка олий лигаси (MLS) клуби “Интер Майами”нинг аргентиналик ҳужумчиси Лионель Мессининг асосий маоши 12 миллион долларни ташкил этади. Шунингдек, у кафолатланган товон пули сифатида яна 20,45 миллион доллар олади. Бу ҳақда MLS футболчилар уюшмаси сайтида маълум қилинган, деб хабар беради Kazinform ТАСС агентлигига таяниб.

"Интер Майами”да Мессига "Барселона"даги испаниялик жамоадошлари, ҳимоячи Жорди Альба ва ярим ҳимоячи Серхио Бускетс қўшилади.

Альбанинг асосий маоши - 1 миллион доллар, кафолатланган товон пули - 1,25 млн доллар. Бускетснинг асосий маоши - 1,5 млн доллар ва товон пули - 1,775 млн доллар олади.

Месси Франциянинг “ПСЖ” клубида икки мавсум ўйнади ва июнь ойида “Интер Майами”га ўтди. Янги клуби таркибида у 13 та ўйин ўтказиб, 11 та гол урди ва 5 та голли узатмани амалга оширди.

У билан 2018 йилда асос солинган «Интер Майами» ўзининг тарихдаги илк муваффақияти - Лига кубогига эришди.

Месси 36 ёшда. У мукофотлар сони бўйича рекордчи, 44 та унвонга эга. 2003 йилдан 2021 йилгача Месси "Барселона" таркибида бўлган ва 10 марта Испания чемпиони бўлган. У 8 марта Испания Суперкубоги, 7 марта Испания Кубоги, 4 марта Чемпионлар лигаси, 3 марта УЕФА суперкубоги ва клублар ўртасидаги жаҳон чемпионатида ғолиб чиққан.

2021 йилда у йилнинг энг яхши футболчисига топшириладиган “Олтин тўп”ни 7-чи марта қўлга киритди ва рекорд ўрнатди.

Сўнгги хабарлар