Мекcикада автобуснинг ағдарилиши оқибатида 18 киши ҳалок бўлди

ASTANA. Kazinform – Мексиканинг Оахака штатида йўловчи автобусининг ағдарилиб кетиши оқибатида 18 киши ҳалок бўлди, 29 киши жароҳатланди, деб хабар беради Anadolu.

Штат губернатори Саломон Хара пойтахт Мехико шаҳридан келаётган автобус Митла-Техуантепек трассасида ҳалокатга учраганини маълум қилди.

Унга кўра, 29 киши жабрланган, улардан икки нафарининг аҳволи оғир. Барча жабрланганлар шифохоналарга етказилган.

Губернатор ҳалок бўлганларнинг яқинларига ҳамдардлик билдириб, воқеа сабаблари аниқланишини таъкидлади.

Маҳаллий матбуот хабарларига кўра, ҳалок бўлганлар ҳукмрон “Миллий тикланиш ҳаракати” (MORENA) партияси тарафдорлари бўлган. Улар якшанба куни Мехико шаҳрида президент Клаудия Шейнбаумнинг митингидан қайтаётган эди.

Эслатиб ўтамиз, бунгача 26 февраль куни Таиландда сайёҳлар автобуси ағдарилиб, 18 киши ҳалок бўлганини ёзган эдик.