МДҲнинг биринчи халқаро кинофестивали Қозоғистонда бўлиб ўтади

MINSK. Kazinform — МДҲ штаб-квартирасида экспертлар иштирокида “Ҳамдўстлик” халқаро кинофестивалини ўтказиш таклифи муҳокама қилинди, деб хабар беради Kazinform агентлиги мухбири.

Йиғилишда ташкилотга аъзо давлатлар ва МДҲ Ижроия қўмитаси вакиллари иштирок этди. Унда мутахассислар “Ҳамдўстлик” кинофестивалини ташкил этиш таклифини муҳокама қилиб, тадбир лойиҳасини келишиб олдилар. Энди тегишли ташаббус МДҲ Ҳукумат раҳбарлари кенгашига киритилади.

Эслатиб ўтамиз, МДҲ доирасида кинофестиваллар ўтказишни Қозоғистон таклиф қилган эди. Бу - ташкилотга аъзо давлатларнинг кинематография ва миллий асарлар тарғиботи соҳасидаги ҳамкорлигини мустаҳкамлашга хизмат қилади. 

Шу билан бирга, ушбу тадбирни ҳар икки йилда бир марта ҳар бир мамлакатда ўтказиш режалаштирилган.

Экспертлар йиғилишида маълум қилинганидек, МДҲ доирасида биринчи кинофестивални Қозоғистонда ташкил этиш режалаштирилган. 

Эслатиб ўтамиз, яқинда МДҲ штаб-квартирасида экспертлар иштирокида “МДҲ+” форматини яратиш имкониятлари муҳокама этилган эди. Бу ташаббус Қозоғистон томонидан ҳам таклиф қилинган.

Бундан ташқари, жорий йил 28 апрелда Ўзбекистон пойтахтида МДҲ Иқтисодий кенгашининг мажлиси бўлиб ўтади.