Маймун чечаги: Қозоғистон аэропортлари ва чегараларида назорат чоралари кучайтирилди
ASTANА. Кazinform - Қозоғистон Республикаси Соғлиқни сақлаш вазирлиги дунёда маймун чечаги касаллигининг ҳозирги ҳолати ва мамлакат ҳудудида инфекция тарқалишининг олдини олиш бўйича кўрилаётган чора-тадбирлар тўғрисидаги маълумотларни эълон қилди.
Вазирлик маълумотларига кўра, Қозоғистон Республикасида маймун чечаги касаллиги қайд этилмаган.
Соғлиқни сақлаш вазирлиги томонидан инфекциянинг мамлакатга кириб келишининг олдини олиш бўйича зарур чоралар кўрилди.
Санитария-карантин пунктлари, жумладан, аэропортлар ва чегара ўтиш жойларида назорат чоралари кучайтирилди. Маймун чечаги касаллиги қайд этилган мамлакатлар фуқароларига эътибор қаратилмоқда.
Инфекция тарқалишининг олдини олиш учун Соғлиқни сақлаш вазирлиги эндемик мамлакатларга саёҳат қилишни режалаштираётган фуқароларга қуйидаги эҳтиёт чораларини кўришни тавсия қилади:
1. Касал одамлар ва ёввойи ҳайвонлар билан алоқа қилишдан сақланинг. Вирус юқтирган маймунлар, каламушлар ва бошқа ҳайвонлар билан алоқа қилиш орқали юқиши мумкин.
2. Ҳимоя воситаларидан фойдаланинг. Ҳайвонлар ёки уларнинг маҳсулотлари билан ишлашда ҳимоя кийим ва қўлқоплардан фойдаланиш муҳимдир.
3. Гигиена қоидаларига риоя қилинг. Қўлларни мунтазам ювиш ва қўлларни тозалаш воситаларидан фойдаланиш инфекцияни тарқалиш хавфини камайтиришга ёрдам беради.
4. Ўта зарурат бўлмаса, маймун чечаги касаллиги қайд этилган мамлакатларга бормасликни маслаҳат берамиз.
5. Биринчи аломатларда шифокор билан маслаҳатлашинг. Агар тошма, юқори ҳарорат ва бошқа аломатлар пайдо бўлса, дарҳол тиббий ёрдамга мурожаат қилишингиз керак.
Қозоғистон Республикаси Соғлиқни сақлаш вазирлиги эпидемиологик вазиятни кузатиб бораётгани ва ҳар қандай ўзгаришларга зудлик билан жавоб беришга тайёрлигини маълум қилди.
