Маулен Ашимбаев ва ЕХҲТ ПА делегацияси Орол экотизимини тиклаш лойиҳаларини муҳокама қилди
ASTANA. Kazinform – ҚР Сенати раиси Маулен Ашимбаев Европада хавфсизлик ва ҳамкорлик ташкилоти Парламент Ассамблеясининг Марказий Осиё бўйича махсус вакили Фараҳ Каримий бошчилигидаги делегация билан учрашди. Томонлар ўзаро ҳамкорликни, жумладан, халқаро ташкилотлар доирасидаги ҳамкорликни янада ривожлантириш истиқболларини муҳокама қилдилар, дея хабар беради Кazinform агентлиги ҚР Парламенти палатаси матбуот хизматига таяниб.
Маулен Ашимбаев Қозоғистон ЕХҲТга хавфсизлик ва ҳамкорликнинг фундаментал масалалари бўйича қарорлар қабул қилиш учун самарали кўп томонлама платформа сифатида қарашини таъкидлади.
Сенат раиси Марказий Осиё давлатлари ўртасидаги муносабатларни стратегик шериклик руҳида ривожлантиришга алоҳида эътибор қаратди. Давлат раҳбари Қасим-Жомарт Тоқаев бу масалага катта эътибор қаратмоқда.
Марказий Осиё давлатларининг атроф-муҳит ҳолати, иқлим ўзгариши, трансчегаравий дарёлар, ирригация, сув ресурсларидан оқилона фойдаланиш ва бошқа соҳалардаги муаммолар билан боғлиқ долзарб масалалари муҳокама қилинди. Хусусан, Орол денгизи экотизимини тиклаш бўйича қўшма лойиҳалар ва палатанинг бу борадаги қонунчилик ишларига алоҳида эътибор қаратилди.
– Минтақавий яқинлашув тенденциялари мамлакатларимизнинг миллий манфаатларига жавоб беради ва Марказий Осиёнинг улкан иқтисодий ва маданий салоҳиятини рўёбга чиқаришга хизмат қилади. 2022 йилда давлат раҳбарлари Марказий Осиёни ХХI асрда ривожлантириш бўйича дўстлик, яхши қўшничилик ва ҳамкорлик тўғрисидаги шартномани имзоладилар. Ўзбекистон, Қирғизистон ва Тожикистон билан ҳамкорлик бўйича икки томонлама парламентлараро комиссиялар доирасида фаол иш олиб бормоқдамиз. Бундан ташқари, биз янги платформа – Марказий Осиё давлатлари парламентлараро форумини яратдик. Ўтган йили биринчи форум Қозоғистонда бўлиб ўтди, — деди палата раиси.
Маулен Ашимбаев парламентийларга Қозоғистонда Давлат раҳбари ташаббуси билан амалга оширилаётган ислоҳотларнинг бориши ҳақида ҳам ахборот берди.
ЕХҲТ ПА вакиллари Қозоғистоннинг сиёсий ва ижтимоий-иқтисодий ҳаётида рўй бераётган ўзгаришлар муҳимлигини қайд этиб, уларнинг натижаларини юқори баҳоладилар.
