Марказий Осиёда диаспораларни ривожлантириш масалалари муҳокама қилинди

TASHKENT. UzA-Kazinform – Тошкентда «Марказий Осиёда диаспораларнинг ривожланиши барқарор ривожланишнинг муҳим омили» мавзуида халқаро илмий-амалий конференция бўлиб ўтди, деб хабар беради Kazinform ЎзАга таяниб.

Форум Ўзбекистон Миллий университети, Марказий Осиё халқаро институти ҳамда Ўзбекистон Республикаси Вазирлар Маҳкамаси ҳузуридаги Миллатлараро муносабатлар ва хорижий давлатлар билан дўстлик алоқалари қўмитаси ҳамкорлигида ташкил этилди.

Тадбирда Марказий Осиё давлатлари, Озарбайжон, Германия, Польша ва Россиянинг 100 дан ортиқ илмий, академик ва таҳлилий муассасалари вакиллари иштирок этди. Хусусан, Конрад Аденауэр номидаги жамғарманинг Ўзбекистондаги ваколатхоналари, Қозоғистон Республикаси Президенти ҳузуридаги Стратегик тадқиқотлар институти, Тожикистон Республикаси Президенти ҳузуридаги Стратегик тадқиқотлар маркази, Туркманистон Ташқи ишлар вазирлиги Халқаро алоқалар институти, Туркманистон Ташқи ишлар вазирлигининг ИМО стратегик тадқиқотлар илмий маркази, Туркманистон Фанлар академияси, Ломоносов номидаги Москва давлат университетининг Осиё ва Африка тадқиқотлари институти, Россия давлат гуманитар университети.

Ушбу конференция анъанавий бўлиб, олтинчи бор ўтказилмоқда. У Марказий Осиёдаги диаспораларнинг ривожланишига, шунингдек, ижтимоий-гуманитар соҳадаги фаннинг янги тармоғи – диаспорологияга бағишланган.

Тадбир давомида илмий ва академик маърузалар тингланди, амалий чора-тадбирлар белгиланди, Марказий Осиё минтақасида ҳамкорликни янада мустаҳкамлаш ва диаспорологияни ривожлантириш бўйича тегишли тавсиялар ишлаб чиқилди.