Мамлакат қиёфаси – ҚР Бош вазири жорий йилда 53 та темир йўл вокзалини таъмирлашни топширди
ASTANA. Kazinform – Жорий йилда Қозоғистонда 53 та темир йўл вокзалини реконструкция қилиш режалаштирилган. Бу ҳақда Ҳукумат йиғилишида ҚР Транспорт вазири Марат Қарабаев маълум қилди.
Вазирнинг сўзларига кўра, ушбу лойиҳаларни молиялаштириш бўйича халқаро молия институтлари билан музокаралар олиб борилмоқда.
“Умуман олганда, темир йўл соҳасида лойиҳаларнинг амалга оширилиши 20 йил ичида ижтимоий-иқтисодий йўналишда 11 триллион тенге мультипликатив самарага эришиш имконини бермоқда. Шунингдек, 2025-2029 йилларда ялпи ички маҳсулотнинг тахминан 0,4 фоиздан 1 фоизгача ўсишига хизмат қилади”, – деди Марат Қарабаев бугун Ҳукумат йиғилишида.
Шу билан бирга, вазир жорий йилнинг апрель ойида барча лойиҳалар бўйича қурилиш-монтаж ишларини бошлаш режалаштирилганини айтди.
ҚР Бош вазири Олжас Бектенов темир йўл вокзалларини модернизация қилиш масаласига алоҳида урғу берди.
“Мен сизга вокзаллар ҳақида топшириқ бердим. Бу мамлакатимиз имиджига, обрўсига дахл қиладиган жуда муҳим масала. Шунинг учун бу ишлар шу йил якунланиши керак, тегишли молиялаштириш зарур”, – деди Ҳукумат раҳбари.
