Малайзия БРИКСга қўшилиши мумкин

ASTANA. Kazinform - Малайзия БРИКСга кириш учун ариза топширди. Ариза Россияга юборилди, чунки у ҳозирда ассоциациянинг раиси ҳисобланади. Бу ҳақда якшанба куни Малайзия бош вазири Анвар Иброҳим маълум қилди, дея хабар беради Kazinform Синьхуа агентлигига таяниб.

Бош вазир девонхонасида таъкидланганидек, Малайзиянинг БРИКСга қўшилиш истаги Малайзияга икки кунлик иш сафари чоғида Анвар Иброҳим билан учрашган Россия ташқи ишлар вазири Сергей Лавров билан суҳбатнинг асосий мазмуни бўлди.

Анвар Иброҳимнинг сўзларига кўра, томонлар Малайзиянинг БРИКСга қўшилиши мавзусидан ташқари, икки томонлама ҳамкорликнинг сармоя ва савдо, фан ва технология, қишлоқ хўжалиги, мудофаа ва ҳарбий ишлар, таълим, туризм ва маданият каби турли жиҳатларини ҳам муҳокама қилган.

«Суҳбатимиз асосан Малайзиянинг яқинда Россия раислик қилаётган БРИКСга аъзо бўлиш учун тақдим этган аризаси ҳақида бўлди. Ушбу потенциал аъзолик икки мамлакат учун кенг истиқболларни очиб беради ва ишончли халқаро ҳамкорликни ривожлантиришга содиқлигимизни таъкидлайди», - деди Малайзия ҳукумати раҳбари.

Ўз навбатида, С.Лавров Россия Малайзиянинг БРИКСга бўлган қизиқишини олқишлашини ва уни илгари суришда ёрдам беришини айтди.