Макрон: Франция яқин ойларда Фаластинни давлат сифатида тан олиши мумкин
ASTANA. Kazinform – Франция президенти Эммануэль Макрон Франция яқин ойларда Фаластинни мустақил давлат сифатида тан олиши мумкинлигини айтди, деб ёзади Anadolu.
Бу қарор июнь ойида Саудия Арабистони билан биргаликда ўтказиладиган халқаро конференция доирасида қабул қилиниши мумкин. Конференцияда Исроил ва Фаластин ўртасидаги “можаро”ни ҳал қилишнинг “икки давлат” тамойили муҳокама қилинади ва Макрон йиғилишга ҳам раислик қилади.
Макрон Мисрга икки кунлик ташрифидан сўнг France 5 телеканалига берган интервьюсида Фаластинни тан олиш масаласини кўтарди.
"Биз (Фаластинни) тан олишимиз керак ва яқин ойларда бу қадамга боришимиз мумкин", – деди Франция президенти.
Унинг таъкидлашича, Фаластинни давлат сифатида тан олиш масаласи июнь ойида Саудия Арабистони мезбонлик қиладиган икки давлат ечимига бағишланган халқаро конференцияда тўлиқ ҳал этилиши мумкин.
Эммануэль Макрон 6-7 апрель кунлари Мисрга расмий ташрифи чоғида Саудия Арабистони ҳамраиси сифатида Фаластин ва Исроил ўртасида икки давлат ечимини кўриб чиқиш учун халқаро конференция ташкил этилишини эълон қилди.
Исроил 2023 йил 7 октябрда Ғазога ҳарбий ҳужум бошлаганидан бери Франциядаги мухолифат Фаластинни зудлик билан давлат сифатида тан олиш талабларини кучайтирди.
Эслатиб ўтамиз, Индонезия президенти Прабово Субианто 1000 га яқин фаластинликни, жумладан ярадорларни вақтинча қабул қилишга тайёрлигини маълум қилган эди.
