Магнус Карлсен чемпион бўлди

магнус карлсен
Фото: chess.com

25-30 декабрь кунлари Самарқандда ўтказилган шахматнинг рапид ва блиц йўналишлари бўйича VI жаҳон чемпионати якунланди, деб хабар беради Kazinform агентлиги UzAга таяниб.

Халқаро шахмат федерацияси (ФИДЕ)нинг Ўзбекистонда илк бор ташкил этилган мазкур мусобақасида дунёнинг 50 дан ортиқ мамлакатидан 300 нафардан кўпроқ шахматчи иштирок этди.

Умумий соврин жамғармаси 1 миллион АҚШ долларини ташкил этадиган мазкур жаҳон чемпионати дастурига кўра, 26-28 декабрь кунлари 13 турда рапид, 29-30 декабрь кунлари эса 21 турда блиц мусобақалари бўлиб ўтди.

Рапид йўналишида амалдаги жаҳон чемпиони, норвегиялик Магнус Карлсен 10 очко жамғарган ҳолда VI жаҳон чемпионати ғолиби бўлди. Словениялик Владимир Федосеев иккинчи, хитойлик Янгйи Йу учинчи ўринни эгаллади.

Аёллар ўртасидаги баҳсларда ФИДЕ байроғи остида иштирок этган Анастасия Боднарук биринчи ўринни қўлга киритиб, 2023 йилги жаҳон чемпионига айланди. Ҳиндистонлик Ҳумпи Канеру кумуш, хитойлик Тингжи Ле бронза медалига сазовор бўлди.

Блиц йўналиши бўйича ҳам ғолиблар аниқланди. Чемпионатнинг рапид йўналишида чемпионликни нишонлаган норвегиялик Магнус Карлсен 16 очко билан блицда ҳам биринчи бўлди. ФИДЕ байроғи остида баҳсларда қатнашган Даниил Дубов ва Владислав Артемиев иккинчи ва учинчи ўринларни эгаллади.

Ушбу йўналишда шахматчи хотин-қизлар баҳсларида ҳам ФИДЕ байроғи остида ўйнаб 14 очко жамғарган Валентина Гунина VI жаҳон чемпионати чемпиони деб эътироф этилди. Швецариялик Александра Костенюк иккинчи, хитойлик Зу Жиннер учинчи ўринни эгаллади.

Чемпионат баҳслари якунлангач оммавий ахборот воситалари вакиллари учун матбуот анжумани ўтказилди. Ташкилотчилар беш кун давом этган чемпионат юқори савияда ташкил этилгани ва ўтказилганини таъкидлади.

Тантанали тақдирлаш маросимида ғолибларга чемпионт медаллари ва эсдалик совғалари топширилди.

Сўнгги хабарлар
telegram