Магдебургдаги теракт тафсилотлари маълум бўлди

ASTANA. Kazinform – Немис оммавий ахборот воситаларининг хабар беришича, Магдебургдаги Рождество бозорига ташриф буюрувчиларни машина уриб юбориши оқибатида икки киши ҳалок бўлган, ўнлаб кишилар жароҳатланган.

Саксония-Анхальт (Берлин яқинида) бош вазири Райнер Хазелоффнинг маълум қилишича, полиция Саудия Арабистони фуқаросини ўз машинасини оломон орасига ҳайдаб юборганликда гумон қилиниб ҳибсга олган.

Ҳибсга олинган шахс 2006 йилдан бери Германияда яшаб келган.

Фожиа кечки соат 19:00 атрофида ижарага олинган машинани бошқараётган эркак катта тезликда оломон устига бориб урилганида содир бўлган. Икки киши, жумладан, кичкина бола ҳалок бўлди, камида 60 киши яраланди.

Ички ишлар вазири Нэнси Фаезернинг айтишича, у ва Германия канцлери Олаф Шольц бугун Магдебургга ташриф буюришади.

Шанба куни кечқурун Магдебург соборида теракт қурбонларини хотирлаш маросими бўлиб ўтади. Шаҳар матбуот котиби Майкл Рейф ҳам яқин кунларда шаҳардаги театрлар ва турли маданий тадбирлар бекор қилинишини айтди.

Франция президенти Эммануэль Макрон ижтимоий тармоқлар орқали француз ва немис тилларида ҳамдардлик билдирди.

“Бугун кечқурун Германиянинг Магдебург Рождество бозорида юз берган фожиали воқеалар мени қаттиқ ҳайратда қолдирди. Франция немис халқининг дардига шерик бўлиб, ўзининг чуқур бирдамлигини билдиради”, – деб ёзади у.

Европа комиссияси раиси, Европарламент ва Европа кенгаши раҳбарлари ҳам ҳамдардлик билдирди.