Магдебург теракти: гумондорга айблов қўйилди

ASTANA. Kazinform - Саудия Арабистонидан бўлган, ҳибсда сақланаётган 50 ёшли психиатрга бир нечта қотиллик ва одам ўлдиришга суиқасд бўйича айблов эълон қилинди, деб хабар беради Каzinform агентлиги Euronewsга таяниб.

Қайд этилишича, эркак қарийб йигирма йил давомида Германияда яшаб келган, бироқ ҳужум сабаблари ноаниқлигича қолмоқда.

Шанба куни кечқурун Магдебургда 2000 дан ортиқ одам иштирок этган ўта ўнгчилар намойишида жанжал ва тартибсизликлар бошланди.

Намойишчилар, баъзилари қора балаклавалар кийган ҳолда, «реэмиграция» сўзи ёзилган катта баннерни ушлаб туришган - бу муҳожирлар ва этник немис деб ҳисобланмайдиган одамларни оммавий депортация қилишни ёқловчи ўта ўнг тарафдорлар орасида машҳур атама.

Судья гумонланувчи Толиб Абдулмуҳсинни бешта қотиллик, қотилликка суиқасд ва баданга оғир шикаст етказиш бўйича судгача ҳибсда сақлашга қарор қилди.

Эслатиб ўтамиз, жума куни Магдебургдаги Рождество ярмаркасига ташриф буюрувчиларга уюштирилган ҳужум оқибатида бир неча киши ҳалок бўлган эди. Полициянинг янгиланган маълумотларига кўра, беш киши, жумладан, тўққиз ёшли болакай ва 52, 45, 75 ва 67 ёшли тўрт нафар аёл ҳалок бўлган. 200 дан ортиқ киши жароҳатланган, улардан 40 га яқини ўта оғир ёки оғир тан жароҳати олган.

Расмийларнинг айтишича, гумонланувчи Рождество ярмаркаси ҳудудига кириш учун фавқулодда чиқишлардан фойдаланган. У ерда машина тезлигини ошириб, оломонга бориб урилган. У жиноят содир этган жойда қўлга олинди.