Лондонда Фаластинни қўллаб-қувватлаган намойиш пайтида 100 дан ортиқ одам ҳибсга олинган

Намойиш
Фото: twitter.com/MuhammadSmiry

Лондон полицияси шанба куни 100 дан ортиқ одамни ҳибсга олди. Уларнинг катта қисми Фаластинни қўллаб-қувватлаётган намойишчиларга ҳужум қилишни режалаштирган ўта ўнг гуруҳлар аъзоларидир, дея хабар беради Кazinform мухбири.

Бир кун аввал ўта ўнг гуруҳлар ўз тарафдорларини қарши намойишда иштирок этишга чақирган эди. Шанба куни Лондон марказида миллатчилар ва футбол безорилари ҳамда ҳуқуқ-тартибот идоралари ходимлари ўртасида тўқнашувлар юз берди.

Полиция маълумотларига кўра, Фаластинни қўллаб-қувватлаган митингда 300 мингга яқин одам қатнашган. Намойиш ташкилотчилари Лондон кўчаларида 800 минг киши тўпланганини даъво қилмоқда.

Фаластинни қўллаб-қувватлаш бўйича бу бешинчи митинг хотира кунига, Биринчи жаҳон урушидаги ҳарбий ҳаракатларни тугатган Компьен шартномаси имзоланган кунга тўғри келди.

Лондон полицияси бош вазир, ички ишлар вазири ва бир қатор британиялик сиёсатчиларнинг уруш ёдгорликлари таҳқирланиши ва тартибсизликлар бошланишидан қўрқишларига қарамай, юришни тақиқламади.

Парад Гайд-паркдан бошланиб, марказий ҳарбий обидалар ёнидан ўтди. Ташкилотчилар марш якунланадиган жойни АҚШ элчихонаси биноси яқинида танлашди. Шанба куни Лондонда тартибни сақлаш учун 2000 полициячи навбатчилик қилган.

Сўнгги хабарлар