Лондон шаҳрида Қозоғистоннинг янги сармоявий имкониятлари муҳокама қилинди

LONDON. Kazinform – Лондон шаҳри Қозоғистонни 2021 йилнинг ноябр ойида Глазгода бўлиб ўтган Иқлим ўзгариши бўйича БМТ саммити чоғида эришилган «яшил иқтисодиёт» бўйича келишувларни амалга оширишда муҳим стратегик ҳамкор деб ҳисоблайди. Бу ҳақда Лондон сити лорд-мери Винсент Кивни Қозоғистоннинг Буюк Британиядаги элчиси Ерлан Идрисов билан учрашувда айтиб ўтди, дея хабар беради Kazinform ҚР Ташқи ишлар вазирлигига таяниб.

Буюк Британия пойтахти молия марказидаги Лорд-мэрнинг тарихий қароргоҳи – «Мэншн хаус»да бўлиб ўтган музокаралар чоғида Ерлан Идрисов Қозоғистоннинг янги иқтисодий йўналиши ва Янги Қозоғистон қурилиши доирасидаги ислоҳотлар бўйича кенг кўламли лойиҳаларни амалга ошириш ҳақида батафсил маълумот берди.

Томонлар икки томонлама савдо-иқтисодий муносабатларнинг жадал ривожланиши, шаҳарнинг Қозоғистонда молиявий хизматлар бозорларини ривожлантиришда, шунингдек, мамлакатнинг инновацион ва технологик ривожланишидаги муҳим ролини муҳокама қилдилар. Қозоғистон ташкилотларининг TheCityUK, Лондон фонд биржаси ва бошқалар каби шаҳарнинг етакчи молия институтлари билан узоқ муддатли самарали ҳамкорлиги қайд этилди.

Инглиз ҳуқуқи тамойиллари ва нормалари асосида фаолият юритувчи ва хорижий сармояларни жалб этишнинг муҳим платформасига айланган Астана халқаро молия марказини мустаҳкамлаш бўйича қўшма ишларни давом эттириш муҳимлигига алоҳида эътибор қаратилди. Лондон шаҳри 2015 йилда ташкил этилганлиги эълон қилинганидан бери АХММнинг шаклланиши ва ривожланишида муҳим рол ўйнади.

Элчи Қозоғистон Республикаси Ҳукумати томонидан мамлакатнинг сармоявий жозибадорлигини ошириш, инсон салоҳиятини мустаҳкамлаш, иқтисодиёт ва инвестиция сиёсатига экологик, ижтимоий ва корпоратив бошқарув стандартларини жорий этишга алоҳида эътибор қаратиш бўйича кўрилаётган чора-тадбирлар ҳақида маълумот берди.

Э.Идрисов январ фожиасига қарамай, Қозоғистон энг яхши стандартлар ва халқаро тажрибага мувофиқ қулай ишбилармонлик муҳитини яратиш учун изчил ижобий ўзгаришларга интилаётган сармоявий жозибадор давлат бўлиб қолаётганини таъкидлади.

Қозоғистон дипломати республика Қозоғистон-Британия иқтисодий ҳамкорлигини янада кенгайтириш мақсадида шаҳар билан турли соҳаларда ҳамкорликни чуқурлаштиришга тайёрлигини тасдиқлади.

Бундан ташқари, Элчи Лондон Сити лорд-мэрини 2022 йил 28-30 июн кунлари ўтказилиши режалаштирилган Astana Finance Days йиллик халқаро конференциясида иштирок этишга таклиф қилди.

Лондон шаҳри раҳбарларининг Қозоғистонга ташрифи яхши анъанага айланган. Илгари мамлакатимизга сэр Майкл Сэйвори (2005), сэр Дэвид Брюэр (2006), сэр Джон Статтард (2007), Иан Лудер (2009), сэр Дэвид Вуттон (2012), дама Фиона Вульф (2014) ва Эндрю Пармли (2017) каби лорд-мэрлар ташриф буюришган.

Шунингдек, Қозоғистон 2006 ва 2019 йилларда энг қадимий анъанавий фестиваллардан бири – Лондон шаҳри лорд-мэрининг парадида икки марта иштирок этиб, фолклор нақшлари асосидаги ранг-баранг дастур билан Британия пойтахти меҳмонлари ва аҳолисини лол қолдирганди.