Қуролли кучларнинг 5 мингга яқин ҳарбий хизматчиси сув тошқинларига қарши курашга сафарбар этилган

ASTANА. Кazinform - Қуролли кучларнинг 5 мингга яқин ҳарбий хизматчиси сув тошқинларига қарши курашга сафарбар қилинган. Бу ҳақда Қозоғистон Республикаси Мудофаа вазирлиги расмий вакили Руслан Жангулин маълум қилди.

“Шахсий таркиб Ойил аҳоли пунктигача паромда кунига 10 та рейсни амалга оширди. 43 киши, 31 енгил автомобиль ва 8 тонна гуманитар юк ташилди. Ёйиқ дарёсини кенгайтириш бўйича портлатиш гуруҳи ходимлари 2 марта портлаш амалга оширди. Ақмола вилояти Заречний қишлоғидаги маиший объектларни электр энергияси билан таъминлаш ишлари давом этмоқда. Петропавл шаҳри ва унинг атрофида ишлар давом этмоқда. Сув босиши мумкин бўлган ҳудудлар қум қоплари билан иҳоталанмоқда, маҳаллий аҳоли эвакуация қилинмоқда”, — деди у Марказий коммуникациялар хизматида бўлиб ўтган брифингда.

Унга кўра, ҳудудий мудофаа бригадалари ҳарбий хизматчилари сунъий тўғонни мустаҳкамлаш мақсадида қоплар билан қум тайёрламоқда.

“27 мартдан 11 апрелгача Қуролли Кучларнинг 5 мингга яқин ҳарбий хизматчиси, 170 дан ортиқ ҳарбий техника, 11 вертолёт ва 5 та ҳарбий транспорт самолёти Атирау, Ақмола, Ғарбий Қозоғистон, Қостанай ва Шимолий Қозоғистон вилоятларида сув тошқинларига қарши тадбирларга сафарбар қилинди. 2443 нафар аҳоли эвакуация қилинди, турли хизматларнинг 825 нафар мутахассиси ва 111 минг килограммдан ортиқ юк ташилди. Бу даврда 300 минг қоп қум тайёрланиб, ётқизилди. Ойил қишлоғи аҳолиси паром ёрдамида эвакуация қилинди”, — деди Руслан Жангулин.