Қўлда бургут ушлаб, от минишни хоҳлайман - Мадс Миккельсен Астанадаги Бутунжаҳон кўчманчилар ўйинлари ҳақида

ASTANА. Кazinform — Машҳур Голливуд актёри Мадс Миккельсен Астанадаги ComicCon фестивалининг махсус меҳмони бўлди. “Ганнибал” ва “Доктор Стренж” фильмлари юлдузи Қозоғистон пойтахтидан катта таассурот олди ва у ҳам бўлажак Бутунжаҳон кўчманчилар ўйинларининг бир қисми бўлишни хоҳлашини айтди, деб хабар беради шаҳар ҳокимлиги расмий сайти.

Мадс Миккельсен Астанани яхши билмаса-да, бу шаҳарни жуда яхши кўришини айтди.

“Астана шаҳрини яхши биламан деб айта олмайман, чунки бу ерда бўлганимга атиги 30 соат бўлди. Лекин ишонч билан айта оламанки, шаҳар жуда чиройли. Менга айниқса таомингиз ёқди, жуда мазали. Кўп гўшт едим, қанча еганимни айта олмайман, ажойиб.

Биз Даниядан бўлганимиз учун Астана шаҳрини велоспорт жамоаси орқали биламиз. Тур де Франсга борганимизда велоспорт жамоаларингиз машҳур эди. Уларни велопойгада кўриш жуда яхши бўларди.

Мен шунчаки кўчманчилар ўйинларини томоша қилишни хоҳламайман. Мен ҳам уларнинг бир қисми бўлишни, қўлда бургут ушлаб, от минишни хоҳлайман”, — деди актёр.

Мадс Миккельсен Голливуд актёри бўлиб, у бутун дунёга «Ганнибал» ва «Доктор Стрэнж» каби фильмлардаги роллари билан танилган.