ҚР Ташқи ишлар вазири ЕИ олий вакили билан сиёсий ва иқтисодий ҳамкорликни мустаҳкамлаш истиқболларини муҳокама қилди
Учрашув Дохадаги йиллик форум доирасида бўлиб ўтди.
Томонлар Қозоғистон Республикаси ва ЕИ ўртасида кенгайтирилган шериклик ва ҳамкорлик тўғрисидаги Битим доирасида 29 та йўналишни қамраб олган ҳолда яқин ва ўрта муддатли истиқболда ўзаро ҳамкорликнинг устувор йўналишларини белгилаб олдилар.
Қозоғистон ТИВ раҳбари суҳбатдошни Давлат раҳбари томонидан мамлакатда кучли фуқаролик жамиятига эга «Янги Қозоғистон»ни барпо этиш борасида амалга оширилаётган ислоҳотлар билан атрофлича таништирди. У мазкур ислоҳотлар режаси жамиятни янгилашга қаратилганини, эълон қилинган «Иккинчи республика» концепцияси эса давлат бошқаруви моделини модернизация қилишга қаратилганини таъкидлади.
Ўз навбатида, Европа Иттифоқи дипломатия раҳбари республикада амалга оширилаётган кенг кўламли ислоҳотларни қатъий қўллаб-қувватлашини ҳамда Қозоғистон ва Европа Иттифоқи ўртасидаги ҳамкорликни барча томонларни қизиқтирган барча соҳаларда янада ривожлантиришга кўмаклашишга тайёрлигини билдирди. Маълумки, Европа Иттифоқи Қозоғистоннинг энг йирик савдо ҳамкори ва энг йирик инвесторидир.
Суҳбатдошлар халқаро ва минтақавий кун тартибидаги долзарб масалаларни ҳам муҳокама қилдилар.
Украинадаги вазиятни тартибга солиш бўйича халқаро ҳамжамиятнинг биргаликдаги саъй-ҳаракатларига алоҳида эътибор қаратилди. М.Тлеуберди ўз суҳбатдошини Қозоғистон можарони дипломатик йўл билан ҳал қилиш учун воситачилик хизматларини кўрсатишга, шунингдек, жабрланганларга гуманитар ёрдам кўрсатишни давом эттиришга тайёрлигига ишонтирди.
Қозоғистон Республикаси Ташқи ишлар вазирлиги раҳбари, шунингдек, суҳбатдошнинг эътиборини Ғарб давлатлари томонидан Россияга, Қозоғистонга жорий этган санкцияларнинг билвосита таъсирини биргаликда муҳокама қилиш ва келгусида ҳамкорлик йўналишларини хусусан, транзит йўллари соҳасида ҳамкорликни диверсификация қилиш имкониятларини кўриб чиқиш зарурлигига қаратди.
Томонлар стратегик шерикликни янада чуқурлаштириш учун яқин ҳамкорликни давом эттиришга келишиб олдилар.
Эслатиб ўтамиз, Қозоғистон Республикаси Бош вазири ўринбосари – Ташқи ишлар вазири Мухтар Тлеуберди Қатар томонининг таклифига биноан ХХ Доха халқаро форумида иштирок этди.
