ҚР Ташқи ишлар вазири БМТ Бош котиби Антониу Гутерриш билан учрашди
ASTANА. Кazinform - Нью-Йоркда бўлиб ўтган БМТ Бош Ассамблеясининг 79-сессиясининг юқори даражадаги ҳафталиги доирасида ҚР ва БМТ ўртасидаги ҳамкорлик истиқболлари муҳокама қилинди, деб хабар беради ҚР ТИВ матбуот хизмати.
ҚР Бош вазири ўринбосари – Ташқи ишлар вазири Мурат Нуртилеу БМТнинг Нью-Йоркдаги штаб-квартирасида Бирлашган Миллатлар Ташкилоти Бош котиби Антониу Гутерриш билан учрашди.
Суҳбат чоғида БМТ Бош Ассамблеясининг 79-сессияси эътиборида бўлган халқаро кун тартибининг долзарб масалалари, шунингдек, БМТнинг Қозоғистон Республикаси ва минтақадаги фаолияти, шу жумладан Алмати шаҳрида БМТнинг Марказий Осиё ва Афғонистонда барқарор ривожланиш бўйича минтақавий марказини ташкил этиш доирасидаги ташаббуси муҳокама қилинди.
Қозоғистон Ташқи ишлар вазири ўз мамлакатининг БМТ Низомининг асосий мақсад ва тамойилларига содиқлигини яна бир бор тасдиқлади ва БМТ Бош котибини умумжаҳон тинчлик ва фаровонлик йўлидаги фаолиятини ҳар томонлама қўллаб-қувватлашига ишонтирди.
Вазир М.Нуртилеу, шунингдек, Қозоғистон ташқи сиёсатининг устувор йўналишлари ва мамлакатда амалга оширилаётган ижтимоий-иқтисодий ва сиёсий ислоҳотлар, хусусан, ҚР Президенти Қасим-Жомарт Тоқаевнинг 2024 йил сентябрь ойидаги Қозоғистон халқига Мурожаатида қайд этилган ислоҳотлар ҳақида маълумот берди.
БМТ Бош котиби Қозоғистон ва глобал ташкилот ўртасидаги ҳамкорлик юксак даражада эканини қайд этди. Қозоғистоннинг тинчлик ва хавфсизликни мустаҳкамлаш, барқарор ривожланиш мақсадларига эришиш ва инсон ҳуқуқларини таъминлашга қўшган ҳиссасини юқори баҳолади.
“Биз учун Қозоғистон юқори даражали ҳамкор, кўп томонлама асос, маданиятлар, динлар ва цивилизациялар ўртасидаги мулоқот учун йўлбошчидир. Мамлакатингиз Марказий Осиёнинг таянчи бўлган Шарқ ва Ғарб ўртасидаги кўприкдир.
Мамлакатингизга БМТ ташаббусларини доимий қўллаб-қувватлагани, хусусан, мен 2024 йил июль ойида ШҲТ саммити доирасида ўзим шахсан ташриф буюрган Алматида БМТнинг Марказий Осиё ва Афғонистонда барқарор ривожланиш бўйича минтақавий марказини ташкил этишга кўмаклашаётгани учун миннатдорчилик билдирмоқчиман. ”, деди БМТ Бош котиби А.Гутерриш.
