ҚР Президентига транспорт-логистика соҳасини ривожлантириш ҳақида маълумот берилди
Қозоғистон Республикаси Президенти Қасим-Жомарт Тоқаев раислигида Хавфсизлик Кенгашининг йиғилиши бўлиб ўтди. Йиғилишда мамлакатнинг транспорт-логистика салоҳиятини рўёбга чиқаришда юзага келадиган стратегик вазифалар кўриб чиқилди, деб хабар беради Ақорда матбуот хизмати.
Давлат органлари ва миллий компаниялар раҳбарлари темир йўл, автомобиль, денгиз, ҳаво транспорти, шунингдек, қувур орқали ташиш йўналишларида тез-тез учраб турадиган муаммоларни ҳал этиш борасида амалга оширилаётган ишлар юзасидан маълумот берди.
Давлат раҳбари транзит юк ташиш, жумладан, Транскаспий халқаро транспорт йўналиши орқали ташишни ривожлантириш долзарблигига эътибор қаратди. Шунингдек, маҳаллий маҳсулотларни экспорт қилиш учун транспорт салоҳиятини ошириш муҳимлигини таъкидлади. Бунинг учун инфратузилмавий чекловлар ва бошқа тўсиқларни бартараф этиш, транспорт-логистика хизматлари сифатини ошириш, тарифларни шакллантириш тизимини такомиллаштириш зарур.
Йиғилишда саноат, экспорт ва транзит салоҳиятини бир вақтда ривожлантириш, инфратузилмани қуришнинг замонавий стандартларини жорий этиш, транспорт-логистика соҳасининг иқтисодиётга мультипликатив таъсирини таъминлаш масалаларига алоҳида эътибор қаратилди.
