ҚР Президенти Япония Бош вазирининг махсус маслаҳатчиси Акихиса Нагашимани қабул қилди
ASTANA. Kazinform – ҚР Президенти Япония Бош вазирининг махсус маслаҳатчиси, Вакиллар палатаси аъзоси Акихиса Нагашимани қабул қилди.

“Қозоғистон Япония билан стратегик шерикликни ривожлантиришга катта аҳамият беради. Икки давлат ўртасида дўстлик ва ўзаро англашувга асосланган яқин ҳамкорлик йўлга қўйилган. Қозоғистон ва Япония бир-биридан узоқда, лекин дўстлигимиз мустаҳкам, деймиз”, – деди Давлат раҳбари.
Қасим-Жомарт Тоқаев давлатлар ўртасида савдо-иқтисодий, сармоявий ва илмий-техникавий алоқаларни кенгайтириш учун салмоқли салоҳият мавжудлигини таъкидлади. Президент Япониянинг Қозоғистон иқтисодиётига киритган сармояси миқдори 8 миллиард доллардан ошганини айтди.

Шунингдек, Қозоғистон хорижий инвесторлар, жумладан, илғор япон компаниялари учун қулай шарт-шароитлар яратишга тайёр эканини таъкидлади.
Махсус маслаҳатчи Президентга Япония Бош вазири Шигеру Ишибанинг самимий тилакларини етказди, шунингдек, Токио Қозоғистон-Япония кўп қиррали муносабатларини янада жонлантиришга содиқлигини тасдиқлади.
Қасим-Жомарт Тоқаев ва Акихиса Нагашима олий даражадаги сиёсий мулоқотни мустаҳкамлаш муҳимлигини таъкидлаб, савдо, энергетика, транспорт, таълим, маданий-гуманитар соҳаларда икки томонлама ҳамкорликни чуқурлаштириш истиқболларини, шунингдек, иқлим ўзгариши масалаларини муҳокама қилдилар.