ҚР Президенти Вьетнам Компартияси Марказий қўмитаси Сиёсий бюроси аъзоси Нгуен Суан Тҳангни қабул қилди
ASTANA. Kazinform – ҚР Президенти Қасим-Жомарт Тоқаев Вьетнам Коммунистик партияси Марказий қўмитаси Сиёсий бюроси аъзоси, Хо Ши Мин номидаги Миллий сиёсат академияси директори Нгуен Суан Тҳанг билан учрашди.
Мулоқот чоғида Давлат раҳбари бугунги кунда Қозоғистон-Вьетнам муносабатлари жадал ривожланиб бораётганини таъкидлади. Президент ўзининг ўтган йили Вьетнамга расмий ташрифини мамнуният билан эслади. Ханойга ташрифи чоғида ўтказилган муҳим музокаралар икки томонлама ҳамкорликка сезиларли туртки бўлди.
Қасим-Жомарт Тоқаевнинг таъкидлашича, Вьетнам Қозоғистоннинг Жануби-Шарқий Осиёдаги асосий ҳамкори ҳисобланади. Қозоғистон савдо-иқтисодий, сармоявий ва маданий-гуманитар соҳаларда икки томонлама муносабатларни ҳар томонлама мустаҳкамлашга тайёр.
Бундан ташқари, Давлат раҳбари Қозоғистон ва Вьетнамнинг ижтимоий-иқтисодий ривожланишини қонунчилик нуқтаи назаридан таъминлаш мақсадида парламентлараро ҳамкорликни жонлантириш муҳимлигини таъкидлади.
Нгуен Суан Тҳанг Қозоғистон Президентининг Вьетнамга ташрифи чоғида эришилган келишувларни амалга оширишда Марказий Қўмита Сиёсий бюроси ва мамлакат Миллий йиғилиши фаол иштирок этишини айтди.
Унинг сўзларига кўра, мамлакатларнинг позициялари ўхшаш ва БМТ ва Осиёда Ўзаро Ҳамкорлик ва Ишонч Чоралари бўйича Кенгаш каби кўп томонлама соҳаларда муваффақиятли ҳамкорлик йўлга қўйилган.
Қасим-Жомарт Тоқаев Қозоғистон Стратегик тадқиқотлар институти ва Хо Ши Мин номидаги Миллий сиёсат академияси ўртасида ҳамкорлик тўғрисидаги меморандум имзоланганини олқишлади. У мазкур ҳужжат ҳамкорликдаги илмий изланишларга янги туртки беришига ишонч билдирди.
Давлат раҳбари Вьетнам Президенти Леонг Кионгни келаси йили Қозоғистонга ташриф буюришга ва уни Астана халқаро форуми билан мувофиқлаштиришни таклиф қилди.
