ҚР Президенти: терроризм, экстремизм ва сепаратизмнинг авж олишига йўл қўйиб бўлмайди
ASTANA. Кazinform - Президент Қасим-Жомарт Тоқаев ШҲТга аъзо давлатлар хавфсизлик кенгашлари котиблари билан учрашувда мазкур ташкилот Шанхай ҳамкорлик ташкилоти даврида минтақада барқарорлик ва хавфсизликни таъминлаш, “Уч ёвуз куч”га қарши биргаликда курашиш мақсадида тузилганини эслатди.
— Кўриниб турибдики, бундай таҳдидлар бугун ҳам йўқолгани йўқ, улар ўзгариб, аввалгидан ҳам хавфлироқ бўлиб қолди. Ўз навбатида, биз томондан янада тизимли ва дадил чоралар кўриш зарур. Давлатларимиз яхлитлигини бузаётган терроризм, экстремизм ва сепаратизмнинг авж олишига йўл қўйиб бўлмайди. “Уч ёвуз куч”га, шунингдек, трансмиллий уюшган жиноятчилик, гиёҳванд моддаларнинг ноқонуний савдоси ва киберхавфсизлик муаммоларига қарши курашиш Қозоғистоннинг ШҲТга раислиги даврида асосий устувор йўналишлардан бири сифатида қаралмоқда, - деди президент.
Давлат раҳбари фикрига кўра, терроризм, сепаратизм ва экстремизмга қарши курашиш бўйича 2025-2027 йилларга мўлжалланган ҳамкорлик дастурини қабул қилиш зарур. Шу билан бирга, Президент ШҲТнинг 2024-2029 йилларга мўлжалланган наркотикларга қарши кураш стратегияси ва уни амалга ошириш бўйича Ҳаракатлар дастурини қабул қилиш муҳимлигини таъкидлади.
– ШҲТ замонавий халқаро хавфсизлик архитектурасининг асосларидан биридир. Шунинг учун ташкилотимиз минтақада барқарорлик ва хавфсизликни таъминлашга қаратилган ўзаро келишилган ва аниқ қадамлар намунасини кўрсатиши керак, – деди Қасим-Жомарт Тоқаев.
