ҚР Президенти State Power Investment Corporation компанияси Директорлар кенгаши раисини қабул қилди
PEKIN. Kazinform – ҚР Президенти ХХРга амалий ташрифи доирасида State Power Investment Corporation (SPIC) компанияси Директорлар кенгаши раиси Лю Миншэн билан учрашди.

Суҳбат чоғида энергетика соҳасидаги ҳамкорликни янада ривожлантириш, жумладан, қайта тикланадиган энергия манбаларига асосланган шериклик истиқболлари муҳокама қилинди.
Қасим-Жомарт Тоқаевга China Power International Holding шўба корхонаси Қозоғистонда фаол иш олиб бораётгани ҳақида маълум қилинди. Сўнгги беш йилда Жанатасда шамол энергетикаси лойиҳаси амалга оширилди, Қарағандида қуёш электр станцияси қурилди.
Хитойнинг йирик энергетика компанияларидан бири бўлган SPIC корпорацияси раҳбари Жамбил ва Павлодар вилоятларида умумий қуввати 1 ГВт бўлган шамол электр станцияларини қуриш билан боғлиқ янги инвестиция лойиҳаларини амалга ошириш ҳақида маълумот берди. Бу лойиҳаларга бир миллиард доллардан ортиқ сармоя киритилди.
Шунингдек, Лю Миншэн сўзларига кўра, компания Қозоғистонда йирик гидроэнергетика лойиҳалари ва буғ-газ турбиналари қуриш истиқболларини ўрганиш ниятида.
Президент мамлакат қайта тикланадиган энергия соҳасига илғор халқаро технология ва тажрибаларни жорий этишдан манфаатдор эканини таъкидлади.
Учрашув якунида Қасим-Жомарт Тоқаев Лю Миншэнни жорий йилнинг июнь ойида бўлиб ўтадиган Астана халқаро форумида иштирок этишга таклиф қилди.