ҚР Президенти “Таза Қозоғистон” экологик акциясида иштирок этди
ASTANA. Kazinform – Давлат раҳбари Қасим-Жомарт Тоқаев “Тоза Қозоғистон” республика экологик акцияси доирасида ташкил этилган умумшаҳар шанбалигида иштирок этиб, Астанадаги “Улитау” хиёбонига кўчат ўтқазди. Бу ҳақда Ақорда матбуот хизмати хабар берди.
Президент билан биргаликда кўнгиллилар, “Ассамблея ёшлари” ташкилоти вакиллари, фан, бунёдкорлик саноати, маданият, спорт соҳаларида фаолият юритаётган фаол ёшлар, бўлажак V Жаҳон кўчманчилар ўйинлари иштирокчилари, Президент Ёшлар Кадрлари аъзолари иштирок этиб, 430 туп кўчат экдилар.
Қасим-Жомарт Тоқаев ёшлар билан ҳам суҳбатлашди. Президент жамиятда экология маданиятини шакллантириш, табиатни муҳофаза қилиш муҳим аҳамиятга эга эканини таъкидлади.
“Дарҳақиқат, мамлакатимизни ободонлаштириш катта давлат аҳамиятига эга ишдир. Бу бугун чиқадиган ва эртага унутиладиган бир марталик акция эмас. Бу иш мунтазам равишда олиб борилади. Ватанимизни тоза сақлашимиз керак. Бу миллий муаммо. Қозоғистон тоза бўлиши керак. Ҳеч ким ифлос мамлакатга меҳмон ёки инвестор сифатида келмайди. Лекин, биринчи навбатда, Қозоғистоннинг тоза ва гўзал бўлиши биз учун, яъни одамлар учун зарур. Бу кундалик турмуш тарзига айланиши керак. Шунингдек, бу борадаги ишлар нафақат пойтахт ва йирик шаҳарларда, балки кичик шаҳарча, туман ва қишлоқларда ҳам мунтазам ташкил этилмоқда. Бутун Қозоғистонни тоза сақлаш ёшларга боғлиқ. Мен ёшларга ишонаман. Шу боис ёшлардан умидим катта”, – деди Давлат раҳбари.
Президент қонун устуворлиги ва тартиб барчага тегишли эканини айтиб, бузғунчиликка қарши дадил курашиш зарурлигини таъкидлади.
“Ватанимиз билан фахрланишимиз керак. Вандалларга қарши қатъият билан курашиш керак. Уларни қонун билан қаттиқ жазолашини ҳам айтдим. Ҳамма нарсанинг чегараси бор. Мамлакатимизда тартиб бўлиши керак. Қонунга риоя қилиш керак”, – деди Қасим-Жомарт Тоқаев.
Шундан сўнг Давлат раҳбари Ботаника боғига ташриф буюриб, шаҳар миқёсида ўтказилаётган шанбаликда иштирок этаётган аҳоли, пойтахт коммунал хўжалиги ходимларига ўз миннатдорчилигини билдирди.
