ҚР Президенти Олий суд раиси Асламбек Мерғалиевни қабул қилди

ҚР Президенти Олий суд раиси Асламбек Мерғалиевни қабул қилди, деб хабар беради Kazinform агентлиги Ақордага таяниб.

Давлат раҳбарига суд-ҳуқуқ тизимининг бугунги фаолияти ҳақида маълумот берилди.

Асламбек Мерғалиев Президентнинг мустақил кассация инстанциясини ташкил этиш бўйича маслаҳатлашувлар ўтказиш тўғрисидаги фармойиши ижроси ҳақида маълумот берди.

Ҳуқуқшунослар, олимлар, ишбилармон доиралар вакиллари, Парламент палаталари депутатлари билан ҳамкорликда муҳокамалар ўтказилиб, улар асосида Астанада учта кассация судини (жиноят, фуқаролик ва маъмурий ишлар бўйича) ташкил этиш моделига ижобий баҳо берилди.

Олий суд дастлабки назорат институтини бекор қилишни, “тўлиқ кассация” тартибини қўллашни, кўриб чиқиш учун “оқилона муддат”ни 6 ойдан ортиқ бўлмаган муддатга белгилашни, шунингдек суд муҳокамасини томонларнинг мажбурий иштирокида ўтказишни тавсия қилди.

Ўз навбатида, юқори суд органи назоратга ва суд амалиётининг бир хиллигини таъминлашга алоҳида эътибор қаратади.

Бундан ташқари, Қасим-Жомарт Тоқаевга маъмурий адлия фаолияти ва халқаро ҳамкорликни ривожлантириш ҳақида сўзлаб берилди.

Олий суд раиси суд хизматларининг очиқлиги ва одил судловдан фойдаланиш имкониятларини ошириш мақсадида рақамлаштириш ва сунъий интеллект элементларини жорий этиш ҳақида гапирди.

Давлат раҳбари суд-ҳуқуқ тизимида амалга оширилаётган ислоҳотларни сифатли амалга ошириш, барча босқичларда ишларни кўриб чиқишда қонунийликни таъминлашга алоҳида эътибор қаратди.