ҚР Президенти номига Наврўз байрами муносабати билан табрик телеграммалари келмоқда
ASTANА. Кazinform — Наврўз байрами муносабати билан Президент Қасим-Жомарт Тоқаев номига хорижий давлатлар раҳбарлари ва халқаро ташкилотлардан табрик телеграммалари келмоқда. Бу ҳақда Ақорда матбуот хизмати хабар берди.
Россия Президенти Владимир Путин Қасим-Жомарт Тоқаевни Наврўз байрами билан табриклади.
– Россия-Қозоғистон муносабатлари стратегик шериклик ва иттифоқчилик руҳида муваффақиятли ривожланмоқда. Ишончим комилки, биз дўст халқларимиз фаровонлиги йўлида ўзаро манфаатли алоқаларни янада кенгайтириш, Евроосиё маконида хавфсизлик ва барқарорликни мустаҳкамлаш йўлида кучларимизни бирлаштирамиз, — дейилади табрикда.
Хитой раҳбари Си Цзиньпиннинг ёзишича, Наврўз баҳор келиши ва табиатнинг уйғонишини билдиради. Шунингдек, у ушбу байрам Қозоғистон халқининг фаровонлик, ҳамжиҳатлик ва тараққиётга интилиши билан боғлиқлигини таъкидлади.
– Икки томонлама муносабатларни ривожлантиришга катта аҳамият бераман. Сиз билан мустаҳкам дўстлигим билан фахрланаман. Хитой ва Қозоғистон ўртасидаги анъанавий дўстликни мустаҳкамлаш, икки давлат ўртасидаги мустаҳкам ва ҳар томонлама стратегик шерикликни чуқурлаштириш учун кучларни бирлаштиришга тайёрман, — дейилади телеграммада.
АҚШ Президенти Дональд Трамп телеграммада Давлат раҳбари ва Қозоғистон халқини бирлик ва янгиланиш байрами билан табриклади.
– Мамлакатларимизни узоқ йиллардан бери мавжуд бўлган ўзаро манфаатли ҳамкорлик боғлаб туради. Ишончим комилки, биз келажакда хавфсизлик, иқтисодиёт ва бошқа соҳаларда янги ютуқларга эришамиз. Бунёдкор давлатларимиз муваффақиятли йўлга тушар экан, Америка халқи ҳамиша Қозоғистон суверенитети, мустақиллиги ва ҳудудий яхлитлигини қўллаб-қувватлайди, — деб ёзади Дональд Трамп.
Туркия Президенти Режеп Таййип Эрдоған ўз телеграммасида Наврўзнинг кўп асрлик анъаналари тинчлик, биродарлик ва тотувлик муҳимлигини эслатишини таъкидлади.
– Ўйлайманки, Наврўз бутун дунёда тинчликка ишончни мустаҳкамлайди, халқаро мулоқот ва ҳамкорликни янги босқичга олиб чиқишга ёрдам беради. Мамлакатларимиз ўртасидаги мустаҳкам дўстлик ва қардошлик ришталари бундан кейин ҳам жадал ривожланиб, икки томонлама ҳамкорлигимиз янада кенгайишига ишонаман, — дейилади табрикда.
Давлат раҳбарини, шунингдек, Ўзбекистон Президенти Шавкат Мирзиёев, Қирғизистон Президенти Садир Жапаров, Тожикистон Президенти Эмомали Раҳмон, Туркманистон Президенти Сердар Бердимуҳамедов, Туркманистон Халқ Кенгаши Раиси Гурбангули Бердимуҳамедов, Озарбайжон Президенти Илҳом Алиев, Эрон Президенти Масъуд Пезешкиан, Фаластин Президенти Маҳмуд Аббос, Татаристон Раиси Рустам Минниханов, Туркий давлатлар ташкилоти Бош котиби Кубаничбек Омиралиев, қатор халқаро ташкилотлар раҳбарлари ва бошқа расмий шахслар табриклади.
Табрик телеграммалари келишда давом этмоқда.
Эслатиб ўтамиз, Давлат раҳбари Қозоғистон халқини Наврўз байрами билан табриклади.
