ҚР Президенти Maire Tecnimont компанияси бош директорини қабул қилди
RIM. Kazinform – Қозоғистон Президенти Қасим-Жомарт Тоқаев Италияга расмий ташрифи доирасида Maire Tecnimont компанияси бош директори Алессандро Бернинини қабул қилди. Бу ҳақда Ақорда расми сайти хабар берди.

Суҳбат чоғида энергетика ва нефть-кимё соҳаларидаги ҳамкорлик истиқболлари муҳокама қилинди.
Давлат раҳбари компания декарбонизация ва энергетикага ўтиш бўйича лойиҳаларни амалга ошириш, шунингдек, дунёнинг 45 давлатида кенг кўламли иш олиб боришда катта тажрибага эга эканини таъкидлади.

Президентнинг сўзларига кўра, Қозоғистон Maire Tecnimont компаниясининг карбонат ангидрид чиқиндиларини сезиларли даражада камайтириш ва яшил технологияларни ривожлантиришга қаратилган муҳим режасидан жуда манфаатдор. Чунки Қозоғистон Париж келишуви доирасида 2060 йилгача углерод нейтраллигига эришиш мажбуриятини олган ва ишлаб чиқаришга илғор технологияларни жорий этишга интилмоқда.
Алессандро Бернини Қасим-Жомарт Тоқаевга компания томонидан бутун дунёда амалга оширилаётган ва ишлаб чиқилаётган йирик лойиҳалар ҳақида маълумот берди. Шунингдек, у Қозоғистон энергетика соҳасини ривожлантириш бўйича ўз тавсияларини билдирди.
Давлат раҳбари компаниянинг Қозоғистонда газ-кимё мажмуаси қурилишида иштирок этиш ниятини ижобий баҳолади. Атирау вилоятидаги газ-кимё мажмуаси қурилишининг иккинчи босқичининг полимеризация участкасини лойиҳалаш бўйича шартнома ўтган йилнинг апрель ойида Maire Tecnimont компанияси билан имзоланган эди.