ҚР Президенти Коррупцияга қарши курашиш агентлиги раисини қабул қилди

ASTANA. Kazinform – Давлат раҳбари Коррупцияга қарши кураш агентлиги раиси Асхат Жумағалини қабул қилди. Президентга Коррупцияга қарши курашиш агентлиги томонидан мамлакатда амалга оширилаётган чора-тадбирлар тўғрисида ҳисобот берилди.

Президент Сыбайлас жемқорлыққа қарсы іс-қимыл агенттігінің төрағасын қабылдады
Фото: Ақорда

Қасим-Жомарт Тоқаевга “Антикор” хизматининг жорий йилги режаси, жумладан “Қонун ва тартиб” тамойилини амалга ошириш бўйича асосий вазифалар тақдим этилди.

Асхат Жумағалининг сўзларига кўра, ўтган йили коррупция билан боғлиқ 1641 жиноят қайд этилган, тизимли равишда коррупцияга оид 68 та факт аниқланган. Икки уюшган жиноий гуруҳнинг қилмишлари фош этилиб, ҳар икки гуруҳга нисбатан тегишли жазо тайинланди. Коррупцияга алоқадор 1493 киши ҳибсга олинди. Улар орасида 229 нафар турли даражадаги раҳбарлар бор. 914 киши судланган.

2022 йилдан буён агентлик 1,12 триллион тенгега баҳоланган мулкий активлар ва маблағларнинг давлатга қайтарилишини таъминлади. Ўтган йили умумий қиймати 486,5 миллиард тенгелик мулк ва маблағлар қайтарилди.

Президентга агентлик томонидан давлат харидлари ва маблағларнинг мақсадли сарфланиши мониторинги олиб борилгани ва 87,7 миллиард тенгенинг самарасиз сарфланишининг олди олинаётгани маълум қилинди. Муҳим инфратузилмавий ва ижтимоий лойиҳаларнинг қурилиш мониторинги давом этмоқда. Агентлик назоратида 182 та объект мавжуд бўлиб, шундан 81 таси қурилиши тугалланган.

Коррупцияга қарши курашиш хизмати раҳбари Президент топшириқлари ижроси юзасидан ҳисобот берди. Жумладан, йўл соҳасида коррупция ҳолатларига барҳам бериш бўйича таҳлиллар ўтказилиб, ваколатли органларга бир қатор тавсиялар берилди. Агентлик ходимларидан иборат махсус тузилган гуруҳлар ҳудудлардаги йўл қурилиши ва таъмирлаш ишларини назорат қилмоқда. Назоратга олинган 258 та лойиҳадан умумий узунлиги 1,8 минг километр бўлган 119 та участка фойдаланишга топширилиб, уларда аниқланган камчиликларнинг 95 фоизи бартараф этилди.

“Рақамли тенге” платформасида “пулни бўяш” пилот лойиҳаси амалга оширилмоқда. Бу механизм қишлоқ хўжалиги ва йўл хўжалигининг муайян йўналишларида қўлланилади. Кейинчалик уни рақамли тизим билан биргаликда бюджет харажатларининг барча босқичларида жорий этиш режалаштирилмоқда.

Бундан ташқари, тиббиёт, спорт ва ижтимоий қўллаб-қувватлаш соҳаларида коррупция хавфининг ташқи таҳлили якунланди.

Қасим-Жомарт Тоқаевга соғлиқни сақлаш соҳасида ўтказилган таҳлил натижаларига кўра, дори воситаларининг премиум нархи пасайгани ҳақида маълумот берилди. Бу фуқароларнинг эҳтиёжларини қондириш, уларнинг ижтимоий муаммоларини ҳал этишга ижобий таъсир кўрсатади. Мамлакатда беморларни QR код орқали бепул дори-дармон билан таъминлаш лойиҳаси йўлга қўйилди. Ушбу ташаббус сохта рецептлар ёзиш, дори-дармонларни ўғирлаш хавфини камайтиради ва бюджет маблағларини тежайди.

Президентга халқаро ҳамкорлик натижалари, жумладан, Озарбайжон, Россия, Гонконг, Иордания ва Қатарнинг коррупцияга қарши кураш идоралари билан меморандумлар имзолангани ҳақида сўзлаб берилди.

Иқтисодий ҳамкорлик ва тараққиёт ташкилоти ва Давлатлар гуруҳининг коррупцияга қарши курашиш бўйича тавсияларини амалга ошириш бўйича ишлар давом этмоқда. Унинг доирасида илғор халқаро тажрибани жорий этишга қаратилган 2 та қонун лойиҳаси кўриб чиқиш учун Мажилисга киритилди.

Йиғилиш якунида Давлат раҳбари мамлакатда коррупцияга қарши курашни давом эттириш бўйича қатор топшириқлар берди.

Сўнгги хабарлар