ҚР Президенти “Қазпошта” АЖ бошқаруви раиси Асел Жанасовани қабул қилди

ASTANA. Kazinform – Давлат раҳбари “Қазпошта” акциядорлик жамияти бошқаруви раиси Асел Жанасовани қабул қилди. Бу ҳақда Ақорда матбуот хизмати хабар берди.

Президентга компаниянинг ўтган йилги фаолияти якунлари, молиявий аҳволи, шунингдек, ривожланишнинг истиқболли йўналишлари тўғрисида ҳисобот берилди. Асел Жанасованинг сўзларига кўра, сўнгги икки йилда “Қазпошта” соф фойда кўрган ва бюджетга 45 миллиард тенге миқдорида солиқ ва йиғимлар тўлаган.

Қасим-Жомарт Тоқаевга компания биринчи марта Жаҳон почта иттифоқи рейтинги бўйича 50 та энг яхши почта операторлари қаторига киргани маълум қилинди. Юк ташиш жараёнини оптималлаштириш ҳисобига почта жўнатмалари ҳажми 26 фоизга ошди. Жумладан, 20 миллион, шу жумладан, 9 миллион халқаро посилка етказиб берилди.

Давлат раҳбарига HomePost лойиҳасининг бориши тақдим этилди. Ушбу ташаббус доирасида уй яқинидаги дўконлар ҳудудида 180 та буюртма бериш пункти очилди. Бу йил уларнинг сони 1 мингтага этади. YTO Express компанияси билан ҳамкорлик доирасида почта инфратузилмасини модернизация қилиш учун 50 миллион доллар миқдорида сармоя киритилди.

“Қазпошта” АЖ бошқаруви раиси Давлат раҳбарига хизмат кўрсатиш сифатини ошириш мақсадида жорий этилган янгилик ҳақида сўзлаб берди. Бу борада Japan Post, Toshiba ва Cainiao компаниялари билан транспорт ва логистика соҳасида қўшма лойиҳалар амалга оширилмоқда. Бундан ташқари, халқаро бозорларга чиқиш имконини берувчи Keruen хизмати ривожланмоқда.

Қасим-Жомарт Тоқаевга Ақтўбе аэропортида мультимодаль омбор қуриш режалаштирилаётгани маълум қилинди. 15 минг квадрат метр майдонга эга ушбу иншоот Туркиянинг S-Sistem компанияси билан ҳамкорликда қурилади.

Йиғилиш якунида Давлат раҳбари компаниянинг молиявий ҳолатини яхшилаш, электрон тижорат соҳасида мамлакатнинг МДҲга йўналтирилган транспорт-логистика салоҳиятини ривожлантириш, рақамли ечимларни жорий этиш бўйича ишларни давом эттириш бўйича топшириқлар берди.