ҚР Президенти қатор давлатларнинг элчиларидан ишонч ёрлиқларини қабул қилди
“Ақорда” қароргоҳида ўн тўртта давлатнинг фавқулодда ва мухтор элчиларининг ишонч ёрлиқларини ҚР Президенти Қасим-Жомарт Тоқаевга топшириш маросими бўлиб ўтди, деб хабар беради Кazinform.
Давлат раҳбари дипломатларга Қозоғистон БМТ Низомининг мақсад ва тамойилларига асосланган адолатли дунё барпо этиш тартибини қўллаб-қувватлашини таъкидлади.
“Қозоғистон мамлакат хавфсизлиги ва барқарор ривожланишини таъминлашга қаратилган тинчликсевар ташқи сиёсат юритмоқда. Биз мамлакатларингиз билан ўзаро манфаатли ва дўстона муносабатларни кенгайтириш ва мустаҳкамлашдан манфаатдормиз”, – деди Президент.
Қасим-Жомарт Тоқаев Қозоғистоннинг иқтисодий тараққиёт борасида келажаги буюк эканини, мамлакат жаҳон иқтисодиётининг муҳим қисмига айланиши учун барча имкониятларни ишга солишини таъкидлади.
“Мамлакатимиз Марказий Осиё минтақасида иқтисодий жиҳатдан энг ривожланган давлатдир. Лекин биз бу билан тўхтаб қолмаймиз. Иқтисодиётимизни янада ривожлантириш учун бор кучимизни ишга соламиз”, – деди Қасим-Жомарт Тоқаев.
Маросим якунида Давлат раҳбари элчиларни Қозоғистондаги дипломатик миссиясининг расман бошлангани билан табриклаб, икки томонлама ҳамкорликни янада мустаҳкамлаш йўлида муваффақиятлар тилади. Қасим-Жомарт Тоқаев ишонч ёрлиқларини топширган элчиларга ўзининг энг эзгу тилаклари ва саломларини йўллади.
