ҚР Президенти “Иқтисодиётни эркинлаштириш чора-тадбирлари тўғрисида”ги Фармонни имзолади
ASTANA. Kazinform – Мазкур Фармон Давлат раҳбарининг жорий йил 7 февраль куни бўлиб ўтган Ҳукуматнинг кенгайтирилган мажлисидаги топшириғини амалга ошириш доирасида ишлаб чиқилган. Ушбу ҳужжат рақобатни ривожлантириш, давлатнинг иқтисодиётга аралашувини камайтириш, бизнес харажатларини камайтириш орқали тадбиркорлик эркинлигини таъминлашга қаратилган. Бу ҳақда Ақорда матбуот хизмати хабар берди.
Биринчидан, Қозоғистон Республикаси Рақобатни ҳимоя қилиш ва ривожлантириш агентлиги ҳузурида хусусийлаштириладиган давлат активлари мезонларини ишлаб чиқиш ва уларнинг рўйхатини шакллантиришни таъминлайдиган Хусусийлаштириш миллий идорасини ташкил этиш режалаштирилмоқда.
Иккинчидан, “Самруқ-Қазна” МФФ” АЖ ва унинг шоъба корхоналарида корпоратив бошқарувнинг мустақиллиги ва сифатини ошириш, шунингдек, улар томонидан амалга оширилаётган харид жараёнларини такомиллаштириш чора-тадбирлари кўрилмоқда.
Учинчидан, товар бозорида рақобатни ривожлантириш бўйича бир қатор аниқ чора-тадбирларни амалга ошириш режалаштирилган.
Тўртинчидан, тартибга солиш сиёсатини янада такомиллаштириш, тадбиркорлик фаолиятини бошлаш ва юритиш тартиб-қоидаларини либераллаштириш тавсия этилади. Шундай қилиб, квазидавлат ташкилотлари томонидан кўрсатиладиган тижорат хизматларидан фойдаланишни, техник шартларни олиш ва муҳандислик тармоқларига уланиш тартибларини соддалаштириш ва автоматлаштириш (рақамлаштириш) кўзда тутилган.
Қозоғистон стандартлари бўйича лойиҳа-смета ҳужжатларини ишлаб чиқмасдан туриб, объектларни қуриш учун илғор халқаро стандартларга жавоб берадиган лойиҳалардан фойдаланишга рухсат бериш тавсия этилади.
Бешинчидан, Фармонда тадбиркорлик субъектларининг ҳуқуқ ва қонуний манфаатларини ҳимоя қилишни кучайтириш, шу жумладан, иқтисодий фаолият соҳасидаги жиноий ҳуқуқбузарликларни жиноятлар тоифасидан чиқариш, прокурорлар билан келишиш ва бошқа давлат органлари томонидан қўлланиладиган тақиқлаш ва чеклаш бўйича чора-тадбирлар комплекси алоҳида блок сифатида белгиланган.
Фармоннинг ҳаётга татбиқ этилиши иқтисодиётда давлат секторининг улушини кенг кўламда ва тез суръатлар билан қисқартиришга, шунингдек, хусусий тадбиркорлик учун иқтисодий маконни кенгайтиришга қўшимча туртки беради.
