ҚР Президенти Ички ишлар вазирини қабул қилди
Давлат раҳбари Қасим-Жомарт Тоқаев Ички ишлар вазири Ержан Саденовни қабул қилди, дея хабар беради Кazinform агентлиги.
Ержан Саденов Президентга мамлакатда қотиллик, безорилик, ўғирлик, талончилик, мол ўғирликлари билан боғлиқ жиноятлар сезиларли даражада камайишига хизмат қилган профилактик чора-тадбирлар тўғрисида маълумот берди. Кўчаларда хавфсизлик даражаси оширилгани қайд этилди.
Шу билан бирга, у “мутлақ муросасизлик” ва жазонинг муқаррарлиги, вояга етмаганлар ҳуқуқларини ҳимоя қилиш ҳақида маълумот берди.
Вазир интернетдаги фирибгарликка қарши кураш бўйича олиб борилаётган ишлар ҳақида ҳам гапирди. Хусусан, йил бошидан буён мобиль рақамлардан келган 37 миллион қўнғироқ блокланган, ноқонуний контентга эга 16 мингта сайт аниқланган.
Президентга гиёҳвандлик ва гиёҳвандлик бизнесига қарши курашиш бўйича 2023-2025 йилларга мўлжалланган комплекс режа ижроси ҳақида маълумот берилди. Е.Саденовнинг айтишича, 31 тоннадан ортиқ гиёҳвандлик воситалари ва 79 тонна прекурсорлар мусодара қилинган, 39 дори лабораторияси йўқ қилинган.
У жиноят-ижроия тизими ва Миллий гвардиянинг бугунги ҳолати ҳақида гапирди.
Қасим-Жомарт Тоқаев мамлакатда ҳуқуқий тартибот ва жамоат хавфсизлиги даражасини янада оширишга қаратилган қатор вазифаларни берди.
