ҚР Президенти ҳузуридаги Миллий жамғармани бошқариш кенгашининг вазифалари кенгайтирилади

ASTANA. Kazinform – ҚР Миллий иқтисодиёт вазирлиги “Миллий жамғармани бошқариш кенгаши фаолиятининг айрим масалалари тўғрисида”ги Президент қарори лойиҳасини жамоатчилик муҳокамаси учун чиқарди.

Янги таҳрирга кўра, Миллий жамғарманинг облигацион қарзлар кўринишидаги маблағларидан фойдаланиш билан боғлиқ масалалар кўриб чиқилган тақдирда, таклифлар ишлаб чиқиш фақат давлат аҳамиятига эга бўлган лойиҳаларни баҳолаш натижалари асосида амалга оширилади.

Шунингдек, кенгаш вазифаларига иккита янги банд киритилди. Улар:

– Қозоғистон Республикаси Миллий жамғармасидан республика бюджетига кафолатланган трансферт миқдорини белгилаш бўйича тавсиялар ишлаб чиқиш.

– Муқобил молиялаштириш манбалари мавжуд бўлмаган тақдирда, давлат аҳамиятига молик энг муҳим объектлар ва лойиҳаларни аниқлаш бўйича таклифлар ишлаб чиқиш.

Ҳужжатда Президентнинг 11 та Фармонини ҳам бекор қилиш кўзда тутилган.

Айтиш жоизки, мазкур ўзгартиришлар Бюджет кодексининг 5-моддаси 16-банди талабларидан келиб чиқади.

Президент ҳузуридаги Миллий жамғарма маблағларини бошқариш бўйича маслаҳат органи таркиби эса ўзгаришсиз қолади. Улар:

Қозоғистон Республикаси Президенти – Кенгаш раиси;

Сенат Раиси (келишув бўйича);

Мажилис раиси (келишув бўйича);

Президент Администрацияси раҳбари;

Миллий банк раиси;

Олий аудитор палатаси раиси;

Молия вазири;

Миллий иқтисодиёт вазири.