ҚР Президенти Ҳукуматга аудиторлар фаолиятини тартибга солиш бўйича топшириқ берди

ASTANА. Кazinform - Давлат раҳбари Қасим-Жомарт Тоқаев Ҳукуматнинг кенгайтирилган йиғилишида “Давлат харидлари тўғрисида”ги қонун лойиҳасини қайта кўриб чиқиш бўйича топшириқ берди.

“Давлат харидлари, давлат-хусусий шериклик, қурилиш соҳасини тартибга солиш тизимини ислоҳ қилиш зарур. Бу ишлар инвестицияларни жалб этиш ва бюджет маблағларидан самарали фойдаланиш борасидаги ислоҳотларни мувофиқлаштириши ва тўлдириши керак. Айни пайтда Мажилисда “Давлат харидлари тўғрисида”ги қонун лойиҳаси кўриб чиқилмоқда. Ушбу ҳужжатни ишлаб чиқиш ва такомиллаштириш керак. Парламент депутатларидан бунга алоҳида эътибор қаратишларини сўрайман. Аввало, аудиторлар фаолиятини тартибга солиш керак”, - деди Президент.

Қасим-Жомарт Тоқаев ҳар кимга қонунни ўз хоҳишига кўра талқин қилишига йўл қўйилмаслиги кераклигини таъкидлади.

“Бу - товар, иш ва хизматлар провайдерларига қўйиладиган талаблар билан боғлиқ масала. Белгиланган муддатни бузганлик ва ишни ёмон бажарганлик учун уларнинг жавобгарлигини кучайтириш зарур. Бу қурилиш саноати учун айниқса муҳимдир. Давлат харидлари тўғрисидаги янги қонун ЕРС шартларидан фойдаланган ҳолда инфратузилма лойиҳаларини тўлиқ амалга ошириш имконини бериши керак. Шу билан бирга, ЕРС шартларини яратиш бўйича тайёргарлик тадбирларининг давомийлиги қисқа бўлиши керак. Шунда ҳокимликлар устувор бўлган ва зудлик билан амалга оширилиши лозим бўлган лойиҳаларни тезлаштиради”, — деди Давлат раҳбари.

Эслатиб ўтамиз, Ҳукумат уйида қайта тузилган Ҳукуматнинг кенгайтирилган йиғилиши бўлиб ўтмоқда.