ҚР Президенти ХХР Давлат кенгаши Бош вазири ўринбосари Лю Гочжунни қабул қилди
ASTANA. Kazinform – Қасим-Жомарт Тоқаев Қозоғистонда расмий ташриф билан бўлиб турган Хитой Халқ Республикаси Давлат кенгаши Бош вазири ўринбосари Лю Гочжунни қабул қилди. Бу ҳақда Ақорда матбуот хизмати хабар берди.
Суҳбат чоғида Қозоғистон-Хитой стратегик шериклигининг бугунги ҳолати ва ривожланиш истиқболлари, шунингдек, Президент Қасим-Жомарт Тоқаев ва Хитой Халқ Республикаси Раиси Си Цзиньпин эришилган келишувларни амалга ошириш масалалари муҳокама қилинди.
Давлат раҳбарининг сўзларига кўра, Қозоғистон Хитойнинг ишончли ҳамкори ва шундай бўлиб қолади. Шу билан бирга, ХХР билан икки томонлама муносабатларни мутлақо янги босқичга кўтариш Қозоғистон учун муҳим устувор вазифа сифатида қаралмоқда.
«Қозоғистон ва Хитой ўртасидаги ҳар томонлама стратегик шериклик ва абадий дўстлик муттасил ривожланиб бормоқда. Биз келажакка ишонч билан қараймиз. Буни алоҳида таъкидлаш керак. Ўзаро товар айирбошлаш ҳажми бўйича Хитой Қозоғистоннинг етакчи савдо-иқтисодий ҳамкоридир. Ўтган йил якунларига кўра, икки давлат ўртасидаги товар айирбошлаш ҳажми 40 миллиард долларга етди. Бу рекорд кўрсаткич. Биз буни 100 миллиард долларгача ошириш ниятидамиз. Бу мақсадга эришиш мумкин», – деди Давлат раҳбари.
Лю Гочжун Хитой ва Қозоғистон ўртасидаги ҳамкорлик жадал ривожланаётганини таъкидлади.
«Сиз Хитой халқининг дўстона ва яхши ниятли дўсти сифатида ўтган йиллар давомида Хитой-Қозоғистон муносабатларини ривожлантиришга катта ҳисса қўшдингиз. Бу Хитой томони томонидан юқори баҳоланмоқда. Ишончим комилки, Сизнинг раҳбарлигингиз остида мамлакатингиз қудратли, гуллаб-яшнаган Янги Қозоғистонни барпо этиш йўлида давом этади. Хитой ва Қозоғистон бир-бирини тўлдирадиган дўстона қўшнилар, ишончли ҳамкорлар ва дўстона давлатлардир», – деди Лю Гочжун.
Учрашувда савдо, сармоя, қишлоқ хўжалиги, транспорт-логистика, энергетика ва туризм соҳаларида ҳамкорликни мустаҳкамлаш истиқболлари кўриб чиқилди. Маданий-гуманитар алоқаларни ривожлантириш масалалари ҳам муҳокама қилинди.
