ҚР Президенти Абай вилояти ҳокими Берик Уалини қабул қилди
ASTANA. Kazinform – Давлат раҳбари Абай вилояти ҳокими Берик Уалини қабул қилди, деб хабар беради Ақорда матбуот хизмати.
Президентга вилоятнинг ижтимоий-иқтисодий аҳволи тўғрисида маъруза қилинди, келгуси давр учун ривожланиш режаси тақдим этилди.
Вилоят ҳокими маҳаллий бюджетнинг харажат ва даромад қисми бўйича ҳар томонлама таҳлил қилинганини таъкидлади. Натижада молиялаштиришнинг устувор йўналишлари белгиланди. Тежалган маблағ эса долзарб муаммоларни ҳал қилишга сарфланади.
Қасим-Жомарт Тоқаевга 2028 йилгача амалга ошириладиган 24 та инвестиция лойиҳаси рўйхати тузилгани маълум қилинди. Умумий қиймати 2,2 триллион тенге бўлган ушбу ташаббуслар 8 мингдан ортиқ иш ўрни яратиш имконини беради. Улар орасида жорий йилда олтита лойиҳа ишга туширилади.
Берик Уали вилоятдаги ижтимоий объектлар ва коммунал инфратузилмаларнинг ҳолати ҳақида маълумот берди. Жумладан, мактаб ва болалар боғчалари қуриш, маданият ва соғлиқни сақлаш муассасаларини аҳоли талабидан келиб чиқиб модернизация қилиш режалаштирилган. Бундан ташқари, коммунал хўжалик соҳасида тўпланган муаммоларни, айниқса, Семей шаҳрининг ушбу йўналишдаги муаммоларини ҳал қилиш жуда долзарбдир.
“Қулай мактаб” миллий лойиҳаси доирасида 5 та объект ва ўқувчилар саройи қурилиши амалга оширилди. Вилоят марказидаги осма кўприкни реконструкция қилиш бўйича лойиҳа-смета ҳужжатлари ишлаб чиқилиб, Ертис (Иртиш) дарёси орқали ўтадиган яна бир кўприк қурилмоқда. Шу билан бирга, осма кўприкдаги юкни камайтириш ва транспорт оқимини тартибга солиш мақсадида Семей шаҳрида айланма йўл қуриш муаммоси ишлаб чиқилмоқда.
Давлат раҳбари ҳудуддаги ижтимоий-иқтисодий муаммоларни ҳал этиш аҳоли турмуш даражасини юксалтиришга хизмат қилишини таъкидлади. Шунингдек, вилоят ҳокимига вилоятни жадал ривожлантириш йўлларини Ҳукумат билан биргаликда кўриб чиқиш, долзарб муаммоларни босқичма-босқич ҳал этиш бўйича топшириқлар берди.
Қасим-Жомарт Тоқаев қайта ишлаш саноатини ривожлантириш, янги доимий иш ўринлари яратиш, вилоят марказини ободонлаштириш ва инфратузилмани ривожлантириш бўйича чора-тадбирлар кўриш зарурлигини таъкидлади. Шу билан бирга, Абай таваллудининг 180 йиллигига бағишланган хотира тадбирларини муносиб савияда ташкил этиш муҳимлигига эътибор қаратди.
