ҚР Молиявий мониторинг агентлиги раиси Президентга ҳисобот берди

Президент
Фото: Ақорда

Президент Қасим-Жомарт Тоқаев Молиявий мониторинг агентлиги раиси Жанат Элимановни қабул қилди. Бу ҳақда Kazinform агентлиги Ақордага таяниб хабар беради.

Давлат раҳбарига Молиявий мониторинг агентлигининг ўтган 9 ойда амалга оширган фаолияти якунлари ва истиқболдаги режалари ҳақида сўзлаб берилди.

Қасим-Жомарт Тоқаевга йил бошидан буён умумий қиймати 217 миллиард тенге бўлган активлар давлатга қайтарилгани, шунингдек, яширин иқтисодиёт даражаси 18,7 фоизгача камайгани ҳақида маълум қилинди.

Бундан ташқари, Жанат Элиманов ҳуқуқ-тартибот идораларига 229 та таҳлилий материаллар юборилгани, гиёҳванд моддалар савдоси билан шуғулланувчи шахсларнинг молиявий операцияларини блокировка қилиш амалиёти йўлга қўйилганини айтди. Бу борадаги ишлар фуқаролар, айниқса, ёшларнинг гиёҳванд моддаларни интернет орқали харид қилишининг олдини олади.

Унга кўра, наркотик моддаларнинг ноқонуний айланишидан олинган даромадларни легаллаштиришда фойдаланилган 924 та банк ҳисоблари блокланган. Криптоактивлар ёрдамида содир этилган иқтисодий жиноятларга қарши курашиш бўйича махсус бўлим ташкил этилди. Криптоҳамёнларни тақиқлаш ва рақамли валютани ечиб олиш механизми ишлаб чиқилди. 9 та ноқонуний крипто алмашинуви ўчириб қўйилган. Унинг молиявий айланмаси 17 миллиард тенгедан ошди.

Президентга Қозоғистонда биринчи марта криптовалюта орқали жиноий йўл билан олинган 47 миллион тенге даромад мусодара қилингани ва Агентликнинг Binance крипто биржасидаги махсус ҳисоб рақамига киритилгани маълум қилинди. Шунингдек, террористик ва экстремистик ташкилотларнинг ҳисоб рақамларига маблағ ўтказишга бўлган 976 та уриниш аниқланиб, блокланди. Иқтисодий ҳуқуқбузарликларнинг айрим белгилари учун жиноий жавобгарликка тортишни соддалаштириш (декриминаллаштириш) бўйича тавсиялар киритилди. Бу тадбиркорларни ҳимоя қилиш чора-тадбирларини кучайтириш имконини беради.

Қасим-Жомарт Тоқаев Агентлик фаолиятининг асосий йўналишлари бўйича қатор аниқ топшириқлар берди. Давлат раҳбари ҳалол тадбиркорликни ҳимоя қилиш, молиявий-иқтисодий жиноятларга қарши курашиш чора-тадбирларини кучайтириш зарурлигини таъкидлади.

Сўнгги хабарлар