ҚР Миллий жамғармасидан 1,1 миллиард АҚШ доллари сотилади
ASTANА. Кazinform – Қозоғистон Республикаси Миллий банки Ҳукуматнинг республика бюджетига трансфертларни ажратиш бўйича дастлабки сўровларидан келиб чиқиб, апрель ойида Миллий жамғарма маблағлари ҳисобидан 1,1 миллиард АҚШ долларигача бўлган хорижий валютани сотишни режалаштирмоқда. Бу ҳақда Миллий банк матбуот хизмати хабар беради.
Март ойи якунларига кўра, тенге курси 0,9 фоизга мустаҳкамланиб, 1 АҚШ доллари 446,77 тенгега етди. Қозоғистон фонд биржасидаги ўртача кунлик савдо ҳажми бир ой ичида 187 миллион АҚШ долларидан 225 миллион АҚШ долларига кўтарилди. Товар айирбошлашнинг умумий ҳажми 3,8 миллиард АҚШ долларини ташкил этади.
“Миллий жамғармадан республика бюджетига трансфертларни таъминлаш мақсадида март ойида 748 миллион АҚШ долларига валюта сотилди. Миллий жамғарма маблағлари ҳисобидан савдо улуши умумий савдо ҳажмининг 19 фоизини ташкил этиб, кунига 44 миллион АҚШ долларидан ошмади. Миллий банк Миллий жамғарма маблағлари билан операцияларни амалга оширишда бозорнинг нейтрал тамойилига амал қилади. Бу чет эл валютасини доимий ва бир хилда сотиш демакдир. Бу амалиёт Миллий жамғармадаги операцияларнинг валюта бозорига таъсирини минималлаштириш имконини беради”, — дейилади Миллий банк хабарида.
Март ойида Миллий банк Ягона жамғариб бориладиган пенсия фондининг пенсия активларидаги хорижий валютадаги улушини 30 фоиз даражасида сақлаб қолиш мақсадида фонд биржасидан чет эл валютасини сотиб олишни давом эттирмоқда. Унинг умумий миқдори 500 миллион АҚШ долларини ёки умумий бозор ҳажмининг қарийб 13 фоизини ташкил қилади.
Миллий банк маълумотларига кўра, март ойида валюта интервенциялари бўлмаган.
Ҳукуматнинг республика бюджетига трансфертлар ажратиш бўйича дастлабки сўровларига кўра Миллий жамғармадан 1-1,1 миллиард АҚШ доллари миқдоридаги хорижий валютани сотиш режалаштирилмоқда. Шунингдек, Ягона жамғариб бориладиган пенсия фонди пенсия активларидаги валюта улушини сақлаб қолиш учун 450-500 миллион АҚШ доллари миқдорида чет эл валютасини харид қилиш режалаштирилган.
Миллий банк ошкоралик тамойили доирасида валюта бозорида ўтказилаётган барча операциялар тўғрисидаги маълумотларни тўлиқ ошкор қилади. Қисқа муддатли истиқболда тенге динамикаси бозор иштирокчиларининг кутишларига, ҳар чораклик солиқ тўловларига, жаҳон бозорларидаги вазиятга ва геосиёсий вазиятнинг ўзгаришига қараб ўзгаради.
Миллий банк мувозанатсизликлар тўпланишига йўл қўймайдиган ва олтин-валюта захираларининг сақланишини таъминловчи мослашувчан валюта курси режимига амал қилишни давом эттиради.
