ҚР Ҳукумати сув тошқинларидан кейин инфратузилмани реконструкция қилиш учун қўшимча 22,7 миллиард тенге ажратди
ASTANА. Кazinform - Қозоғистон Ҳукумати баҳорги сув тошқинлари оқибатларини бартараф этиш ва шикастланган инфратузилма объектларини тиклаш учун фавқулодда захирадан қўшимча 22,7 миллиард тенге ажратди. Тегишли қарорни Қозоғистон Республикаси Бош вазири Олжас Бектенов имзолади. Бу ҳақда Ҳукумат матбуот хизмати хабар берди.
Ақмола, Ақтўбе, Қостанай ва Шимолий Қозоғистон вилоятларидаги автомобиль йўлларини, шунингдек, кўприклар ва сув ўтказгич иншоотларини тиклаш, реконструкция қилиш ва қуриш учун ҳокимликларга маблағ ажратилади. Хусусан, Ақтўбе вилоятида 31 лойиҳа амалга оширилмоқда. Жумладан, Ирғиз-Нура, Ирғиз-Қуттиқўл, Қумтўғай автомобиль йўлларидаги сув ўтказгичларни таъмирлаш, Ойил қишлоғига олиб борувчи автомобиль йўли, Ойил дарёси устидаги кўприкни реконструкция қилиш, шунингдек, Айтеке би тумани Айке қишлоғида кўприк ўтиш жойини қуриш ишлари шулар жумласидандир.
Ақмола вилоятида Атбасар шаҳрига олиб борувчи йўл участкаси, Атбасар – Сочинское автомобиль йўлини модернизация қилинади, Жалтир – Макинск автомобиль йўли, Қалқутан қишлоғи, Жамбил ва бошқа аҳоли пунктларига кириш йўллари таъмирланади. Жами - 14 та йўналиш.
Қостанай вилоятида маблағлар 22 йўналишдаги автомобиль йўллари, кўприклар ва 10 га яқин сув қувурларини таъмирлаш ва реконструкция қилишга сарфланади.
Шимолий Қозоғистон вилоятида 10 та йўлни, жумладан, Кўкшетау-Омск йўналишидаги йўлни таъмирлаш, шунингдек, 22 километрлик сув қувурларини ўртача даражада таъмирлаш режалаштирилган.
Ажратилган маблағлар маҳаллий ижроия ҳокимияти органларига аҳолининг хавфсиз ҳаракатланишини таъминлаш мақсадида сув тошқинларидан кейин бузилган йўл участкаларини ўз вақтида тиклаш имконини беради.
Эслатиб ўтамиз, 2024 йил 17 июль куни Қозоғистон Республикаси Бош вазири Олжас Бектенов сув тошқинларидан кейин турар жой бинолари ва инфратузилмани тиклаш масалалари бўйича йиғилиш ўтказди. Унда Ҳукумат раҳбари қайта тиклаш ишлари суръатини ошириш, муаммоларни зудлик билан ҳал этиш учун одамлар ва техникани сафарбар этиш бўйича топшириқлар берди.
