ҚР Бош вазири: Мамлакатда яна иккита АЭС қуриш учун жойларни аниқлаш ишлари бошланди

ASTANА. Кazinform – Қозоғистон Республикаси Бош вазири Олжас Бектеновнинг “Олти йиллик тараққиёт: Қозоғистон барқарор ривожланиш йўлида” мақоласида 2019 йилдан буён энергетика соҳасида амалга оширилган фундаментал ишлар таҳлил қилинди.

Олжас Бектеновнинг фикрича, коммунал ва энергетика соҳаларидаги инқирознинг энг оғир даври ортда қолди.

– Президент раҳнамолигида мамлакатимиз инфратузилмасини кенг кўламли модернизация қилиш ишлари амалга оширилмоқда.

Кўп йиллар давомида иссиқлик энергетикаси соҳасига етарлича эътибор берилмади: инфратузилма тармоқларининг эскириш даражаси республика бўйича 65 фоизга, айрим ҳудудларда эса ҳатто 90 фоизга етди. Ҳозир биз энергетика ва коммунал соҳадаги инқирознинг мураккаб даврини енгиб ўтдик. Агар 2019 йилда иссиқлик манбаларининг ўртача эскириш даражаси 71 фоизга етган бўлса, энди уни 61 фоизга камайтириш имконияти пайдо бўлди. Бу ишлар давом этади, — деб ёзади у мақоласида.

Ҳукумат раҳбари ўтган йили Давлат раҳбари топшириғига биноан 86 минг километр муҳандислик тармоқларини модернизация қилиш, янги энергия манбаларини ишга тушириш бўйича миллий лойиҳа бошланганини таъкидлади. Ҳукуматнинг фикрича, агар ушбу лойиҳа муваффақиятли амалга оширилса, технологик авариялар сонини 20 фоизга қисқартириш, энергетика ва коммунал тармоқларда эскириш даражасини ўртача 40 фоизга камайтириш, ишлаб чиқариш қувватини 7 ГВт дан ортиқ ошириш имконини беради. Ушбу дастурни амалга оширишда Қозоғистон ишлаб чиқариш корхоналари салоҳиятидан тўлиқ фойдаланиш кўзда тутилган. Қозоғистон компанияларининг ишлаб чиқариш режалаштирилган ҳажми тахминан 3,5 триллион тенгега баҳоланмоқда.

– 2019 йилдан буён электр энергияси истеъмоли 14 фоизга ошиб, қарийб 120 миллиард кВт/соатни ташкил этди. Аҳоли сонининг ўсиши, шунингдек, саноатни ривожлантириш ва рақамлаштириш сиёсатини ҳисобга олган ҳолда, энергия истеъмоли янада ошиши кутилмоқда. Шу муносабат билан Давлат раҳбари топшириғига асосан атом энергетикасини ривожлантириш ташаббуси илгари сурилди. Биринчи атом электр станциясини қуриш жойи белгиланди. Яна иккита станция учун қурилиш жойларини аниқлаш ишлари бошланди, – деди Ҳукумат раҳбари.

Эслатиб ўтамиз, аввалроқ Қозоғистонда биринчи атом электр станцияси қаерда қурилиши маълум бўлгани ҳақида хабар берган эдик.