ҚР Бош вазири Қозоғистон хотин-қизларини 8 март билан табриклади

ASTANА. Кazinform - ҚР Бош вазири Олжас Бектенов қозоғистонликларни 8 март – Халқаро хотин-қизлар куни билан табриклади, деб хабар берди Ҳукумат матбуот хизмати.

Ҳурматли оналар! Ҳурматли аёллар! Сизларни 8 март - Халқаро хотин-қизлар куни билан чин қалбимдан табриклайман!

Халқимизда “Ҳамма яхшилик қуёш нуридан, онанинг оппоқ сутидан пайдо бўлади” деган ҳикматли нақл бор. Она ҳаётнинг мазмуни, борлиқ манбаи, чексиз меҳр манбаи. Ҳар бир оиланинг юраги, ер юзидаги эзгулик ва гўзаллик тожи – хотин-қизлар олижаноб зурриётларни тарбиялаш билан бирга, эл-юртга чинакам меҳр-оқибат намунаси бўлмоқда. Таълим ва соғлиқни сақлаш, қишлоқ хўжалиги ва саноат, тадбиркорлик ва спорт, жамоат ҳаёти ва бошқа кўплаб соҳаларда фидойилик кўрсатаётган инсонларнинг меҳнати юксак ҳурмат-эҳтиромга сазовор. Шу муносабат билан, Президентимиз Қасим-Жомарт Тоқаев таъкидлаганидек, оила институтини мустаҳкамлаш, хотин-қизларни қўллаб-қувватлаш давлат сиёсатининг ўта муҳим устувор йўналиши бўлиб қолади.

Барчангизга сиҳат-саломатлик, бахтли ҳаёт, ишларингизда муваффақиятлар тилайман.

Қуёшли баҳор кунидек ёруғ лаҳзаларингиз кўп бўлсин!

Эслатиб ўтамиз, аввалроқ Қасим-Жомарт Тоқаев қозоғистонликларни 8 март – Халқаро хотин-қизлар куни билан табриклагани ҳақида хабар берган эдик.