ҚР Бош вазири Кентау ИЭМда олиб борилаётган модернизация ишлари билан танишди
ASTANA. Kazinform - Қозоғистон Республикаси Бош вазири Олжас Бектенов Туркистон вилоятига амалий ташрифи чоғида Кентау шаҳридаги иссиқлик маркази ва трансформатор заводи фаолияти билан танишди, деб хабар беради Ҳукумат матбуот хизмати.
Матбуот хизмати хабарига кўра, 1934 йилда қурилган Кентау ИЭМ(иссиқлик электр маркази) шаҳар аҳолисини марказлашган иссиқлик билан таъминлайдиган стратегик объект ҳисобланади.
Шу муносабат билан Давлат раҳбарининг топшириғига кўра, Кентау шаҳри аҳолиси ва ижтимоий соҳа объектларини сифатли иссиқлик билан таъминлаш мақсадида “Кентау ИЭСнинг 7, 8, 9, 10, 11, 12-сонли қозонхоналарни капитал таъмирлаш” лойиҳаси ишлаб чиқилиб, давлат экспертизасининг ижобий хулосаси олинди. Бунгача ҳомийлар ҳисобидан 4,7 километр узунликдаги иссиқлик магистрали ва тўртта қозон таъмирланди. Жорий йилнинг апрель ойида қолган иккита қозонхонада таъмирлаш ишлари бошланиб, якунлаш муддати 2025 йилнинг охирига тўғри келади.
“ИЭСда ишлаб чиқарилган электр қуввати марказнинг ўз эҳтиёжларини қондириш учун етарли эмас, тариф эса капитал таъмирлашга имкон бермайди. Шу муносабат билан, Энергетика ва Молия вазирликларига юқори сифатли иссиқлик таъминоти хизматларини кўрсатиш ва бўлажак иситиш мавсумининг барқарор ўтишини таъминлаш мақсадида таъмирлаш ишларини молиялаштириш имкониятларини кўриб чиқишни топшираман”, — деди Олжас Бектенов.
Бош вазир Кентау трансформатор заводининг ишлаб чиқариш цехига ҳам ташриф буюрди. Бу Кентау шаҳрининг асосий йирик корхонаси бўлиб, унда 700 дан ортиқ киши ишлайди. Заводда умумий мақсадли ва электрлаштирилган темир йўл транспорти учун қувват трансформаторлари ҳамда трансформатор подстанциялари ишлаб чиқарилади. Корхонанинг қуввати йилига 20 минг дона маҳсулот бўлиб, маҳсулотнинг 30 фоизи экспорт қилинади.
Корхонада Олжас Бектенов ишлаб чиқарилаётган маҳсулотларнинг техник тавсифи ва дизайнини такомиллаштириш борасида амалга оширилаётган ишлар, заводнинг ишлаб чиқариш қувватларини кенгайтириш чора-тадбирлари билан танишди. Натижада, Ҳукумат раҳбари мамлакат электр жиҳозлари ишлаб чиқарувчи корхоналар учун қўшимча ишлаб чиқариш юкланиши муҳимлигини таъкидлади. Шу билан бирга, корхона ишлаб чиқаришни кенгайтириш ва кўпайтириш, технологик операцияларни модернизация қилиш ва рақамлаштириш бўйича қарши мажбуриятларни қабул қилиши керак.
Бу ерда Ҳукумат раҳбарига ишлаб чиқариш саноатини ривожлантириш, инвестиция лойиҳаларини амалга ошириш ҳақида маълумот берилди. Айни пайтда 2024-2027 йилларга мўлжалланган инвестиция лойиҳалари жамғармаси ишлаб чиқилган. Умумий қиймати 2,2 триллион тенге бўлган 145 та лойиҳанинг амалга оширилиши 17,7 минг иш ўрни яратиш имконини беради. Улар орасида жорий йилда 116,8 миллиард тенгелик 44 лойиҳа амалга оширилади. Хусусан, олтингугурт кислотаси ишлаб чиқариш, маккажўхорини чуқур қайта ишлаш корхоналарини қуриш лойиҳалари, пахта-тўқимачилик кластерини яратиш режалари тақдим этилди. Шунингдек, вилоятда 4 минг тонна сиғимга эга замонавий сабзавот омбори қурилиши бошланди.
Бош вазир ҳокимликга инвесторларни фаол жалб этиш учун қулай ишбилармонлик муҳитини яратиш, жумладан, кичик саноат парклари ва махсус саноат зоналари ҳудудини кенгайтириш бўйича барча зарур чораларни кўришни топширди.
