Қозоғистоннинг янги Ҳукумати иқтисодий ўсишни 6 фоизга етказиш учун нималар қилмоқчи

ASTANА. Кazinform – ҚР Бош вазири ўринбосари – миллий иқтисодиёт вазири Нурлан Байбазаров Қозоғистон иқтисодий ўсишини 6 фоизга етказиш учун қандай чоралар кўрилишини маълум қилди.

“Йилнинг биринчи ойи паст кўрсаткич билан бошланади. Буни тан олиш керак. Бизнинг олдимизда эса иқтисодиётнинг камида 6 фоиз ўсишини таъминлаш вазифаси турибди. Бунинг учун қандай қўшимча чоралар кўрилади?" — деб сўради Бош вазир Ҳукумат йиғилишида.

Вазир учта йўналишга эътибор қаратишини айтди.

“Биринчи навбатда, давлат харажатларини тўлиқ ўзлаштиришимиз керак. Улар орасида бюджет инвестицияларини ривожлантириш ва давлат харидларини тўлиқ таъминлашга алоҳида эътибор қаратилмоқда. Бу ерда асосий эътиборни маҳаллий ишлаб чиқарувчиларга қаратиш лозим. Иккинчидан, асосий ҳаракатлантирувчилар – қурилиш, ишлаб чиқариш саноати ва транспортда инвестиция лойиҳаларини амалга оширишни жадаллаштиришимиз керак. Яна бир захира – ўрта ва кичик бизнесни янада ривожлантириш. Давлат кўмаги орқали бу ерга иккинчи даражали банкларнинг 1 триллион тенгедан ортиқ пул маблағларини жалб қилиш кўзда тутилган”, - деди у.

Нурлан Байбазаров асосий капиталга киритилган сармоя миқдорини 22 триллион тенгедан камайтирмасликка ҳаракат қилишини айтди.

“Бундан ташқари, “Байтерек” ва “Самруқ” холдингларида ҳам йирик лойиҳалар амалга оширилмоқда. Биз уларни ўзлаштиришимиз керак. Уларда бўш резерв пул бор. Бу биз кўриб чиқаётган янги лойиҳаларга йўналтирилиши лозим. Бу ерда иш кўп. Асосий капиталга инвестициялар 22 триллион тенгедан кам бўлмаслиги даркор. Бу ерда бизга ёрдам берадиган яна бир омил – тўғридан-тўғри хорижий инвестициялар. Биз бунинг даражасини 25 миллиард доллардан туширмаслигимиз зарур. Ана шу йўналишларнинг барчасида тўғри ишласак, 6 фоиз ўсишни таъминлашимиз мумкин, – деди вазирлик раҳбари.

​